𝗕𝗮𝗹𝗹 𝗯𝗲𝗻𝗴 𝘁𝗵𝗶𝗮𝗺 𝗯𝗲𝗿 𝗵𝗿𝗶𝗮𝘁 𝘁𝗮

Get real time updates directly on you device, subscribe now.

Mazuia Memorial Volleyball Tournament, 2021 chu vawiin khan a hmawr bawk a ni a. Mipa team-ah Henry Lalramdina Memorial Volleyball Club-te an champion.
Mazuia Memorial Volleyball Tournament, 2021, kar kalta Thawhlehni atanga Champhai, Kahrawt Volleyball Court-a khelh tan chu Inrinni khan a hmawr bawk a ni ta. Chawhma dar 11-ah Tournament kharna inkhawm hman niin, he hunah hian Pu R. Lalnghakliana, Project Director, DRDA, Champhai chu khual lian a ni a. Khual lian chuan, Mazuia Memorial Tournament, 2021 buatsaih a ni thei chu lawmawm a tih thu sawiin, Tournament a hlawhtlin theih nana tha sengtute chu lawm thu hrilhin, Tournament kharna hun hmangtute chibai a buk a. Final Match khel tur Player-te chu ruih hlo laka fihlim tura chahin, anmahni mai bakah, an chhungte leh thiante pawh ruih hlo ti lo tura fuih zel turin a chah bawk.
Khual lian chuan, Mizo-te chu thil thiam chak ni mah ila, hlawhtling tur chuan kan thil tihna apiangah tei rei peih a pawimawh a ni, a ti a. Tournament chu Mazuia hriat reng nana siam a nih angin, final khel tur player-te chu – Mazuia chhungte hre reng chung leh infiam mi rilru pu chunga khel tura chahin, duhsakna a hlan a. Thil pek a hlan zui bawk a ni.
Tournament kharna inkhawm hi Champhai Dist. Volleyball Association President, Pu Lalremruata’n a kaihruai a. He hunah hian Mazuia chanchin tlangpui chhiar chhuahna hun hman niin, zai thiam : Thangromawia leh Lalbiakfeli-te an zai bawk a ni.
Kharna inkhawm hman zawh hnu hian hmeichhe team – Lalduhthara Memorial Volleyball Club leh Ahruaitei Volleyball Club, Zotlang-te’n final match hmasa zawk an khel nghal a. Ahruaitei Volleyball Club, Zotlang chuan hnehna changin, Mazuia Memorial Volleball Tournament, 2021 hmeichhe Champion Team an ni.
Hmeichhiain an khelh zawh hian mipa final match khelh zui ve leh nghal niin, Henry Lalramdina Memorial Volleyball Club leh Mazuia Home TNT-te’n final match an khel a. Game inhneh tawk takah Henry Lalramdina Memorial Volleyball Club chuan hnehna changin, Mazuia Memorial Volleyball Tournament, 2021 mipa Champion team an ni ta a ni.
He Tournament-ah hian mipa Champion Team-in Trophy leh Rs. 15,000 an dawng a; pahnihna Team-in Trophy leh Rs. 10,000 an dawng ve bawk. Hmeichhe champion Team-in Trophy leh Rs. 10,000 an dawng a; pahnihna Team-in Rs. 7,000 an dawng ve bawk a ni.
Mipa leh Hmeichhia-ah Best Spiker leh Best Setter thlan ve ve ni bawkin, mipa best spiker-ah B. Malsawmtluanga, Henry Lalramdina Memorial Volleyball Club player thlan a ni a, Best Setter-ah Hmangaihthanga, Henry Lalramdina Memorial Volleyball Club Player thlan a ni bawk. Hmeichhe Best Spiker-ah Zodingliani, Ahruaitei Volleyball Club, Zotlang Player thlan niin, Hmeichhe Best Setter-ah Zothanpuii, Ahruaitei Volleyball Club, Zotlang player thlan a ni ve bawk a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More