𝗖𝗵𝗮𝗺𝗽𝗵𝗮𝗶 𝗹𝗲𝗵 𝗮 𝗰𝗵𝗵𝗲𝗵 𝘃𝗲𝗹 𝗿𝗮𝗺𝗻𝗴𝗮𝘄 𝘀𝗶𝗮𝗺 𝘁𝗵𝗮𝗿 𝗹𝗲𝗵 𝗻𝗮𝗻 𝗡𝗘𝗖-𝗶𝗻 𝗖𝗵𝗲𝗻𝗴 𝗡𝘂𝗮𝗶 200 𝗽𝗲

Champhai District Level Fire Prevention Committee buatsaihin ‘Kangmei Ven Hapta’ (Fire Prevention Week) vawi 22-na chu Mizoram hmun dangte rualin Champhai District-ah pawh hman tan a ni.
‘Kangmei Ven Hapta’ hman turah hian ‘Kangmei ti chhuak lo turin mi tin i fimkhur ang u’ tih chu thupuiah hman a ni a. Vawiin khan Champhai Dist.-ah pawh ‘Kangmei Ven Hapta’ hawnna hun hi Kahrawt Field-ah buatsaih niin, Pu T.J. Lalnuntluanga, Environment, Forest & Climate Change Minister chuan Khual lian niin a hawng a. Kangmei ven kawnga inzirtirna Short Video Clip siam chu a tlangzarh nghal bawk. Pu T.J. Lalnuntluanga chuan, Champhai Dist-a kangmei ven hapta hawnna hun a hmanpui thei chu lawmawm a tih thu leh, Champhai dist. chu ram ngaw ti chereu chak leh kangmei chhuah tamna district a nih avangin tha thlah loa tan tlan a ngaih thu a sawi a. Kangmei chhuak leh ram ngaw tih chereu avanga tawrhna hrang hrang thleng thinte tar langin, kangmei leh ram ngaw chereu avanga harsatna thleng thinte sut kian nan project tha tak siam a nih thu leh NEC pawhin tun hnaia a pawmpui thu a sawi a. Kangmei chhuaha khawtlang tang rualin chhiatna nasa zawk a. thlen hmaa an thelh mit thin chu entawntlak a tih thu leh tlawmngaia kangmei chhuak thelh tura thawk chhuak thinte chu fakawm a tih thu a sawi bawk.
Environment, Forest & Climate Change Minister chuan, Mizoram chu tlang ram, nipui laia ro tak a nih avangin chenna in leh ram kang tuar nasa a ni tih sawiin, buh leh thlai chinna atana vah ni lo – ram dang kang thin chu ven a tul tak zet a ni, a ti a. Ram hruaitu, khawtlang hruaitu leh Sawrkar dept. hotu kal khawmte chu thunun loh kangmei chhuak thinte ven dan leh a pawi dante mipuite hnena zirtir thin tura chahin, ram din hmun leh kangmei ven pawimawhnate hre thar leh theuh turin a sawm a. Khual lian chuan, Champhai District-ah nikum chhungin kangmei tum 76 chhuak avanga ram hectare 786.6-a zau a kan ral thu leh, heng zinga 61 chu Lo/Leipui/Huan kang vang a nih thu leh Forest ram kang tum 4 a thlen thu a tar lang a; Champhai District mipuite chu kangmei ti chhuak lo tura chahin, kanmgmei ven hapta hman thin chuan mi tinte thinlungah fimkhurna tuh se a duh thu leh tul loa kangmei tih chhuah leh thunun loh mei tih chhuah kawnga mipuite zirtir a, ti thangharhtu a nih ngei a beisei thu a sawi a ni.
Hun hman kaihruaitu – Pi Maria C.T. Zuali chuan, khua a thal chhoh leh tak avangin kangmei lakah mi tinte fimkhur zual a ngaih thu sawiin, kangmei ven kawngah mi dangte zirtir chhawngtu nih tum theuh tur leh neitu nihna thinlung pu chunga kangmei ti chhuak lo tur leh kangmei ven leh thelh kawngah thahnem ngai taka thawk turin mipuite a sawm a ni.
He hunah hian Pu Lalduhthlana, DFO Champhai&Member Secretary, District Level Fire Prevention Committee chuan report pein, Pu F. Lalchhandama, Station Officer, Fire & Emergency Services Champhai chuan kangmei chhuah theih dan leh kangmei chhuak laka chet lak dante a sawi a; Pu PC. Lalrawnliana, Secretary, Sub Hqtrs. YMA Champhai kaihhruainain kangmei ven kawnga intiamkamna lak niin, Pu Lalhmingmawia Pachuau, President, MJA Champhai District chuan lawm thu sawiin hun a khar a ni.
He hun hmanah hian Sawrkar Office tina hotu lute leh Champhai District-a VC, YMA, MJA, MUP, MHIP, CNC-te bakah, Yamaha Riders leh Buffalo Riders-te leh sawm bikte an tel a ni.