𝗘𝗶 𝗹𝗲𝗵 𝗯𝗮𝗿𝗮 𝗶𝗻𝘁𝗼𝗱𝗲𝗹𝗵 𝗻𝗮𝗻𝗮 𝗵𝗺𝗮 𝗹𝗮𝗸 𝘁𝗵𝗲𝗶𝗵𝗻𝗮 𝗵𝗿𝗮𝗻𝗴 𝗵𝗿𝗮𝗻𝗴 𝘀𝗮𝘄𝗶𝗽𝘂𝗶

Kar hmasa Inrinni khan Pi Maria C.T. Zuali, Champhai Bawrhsap chuan Selam, Lungphunlian leh Tualcheng khuate a tlawh a. Line Department Official-te chu ei leh bara intodelh nana hma lak theihna hrang hrangte a sawipui bawk.
Bawrhsap hian Tualcheng-a Se vulhtute hman tur, FOCUS Project hnuaia hma lakna – ‘Mithun Shelter-Community Level and Water Supply Facility for Grazing Area’ hnuaia Se In sak, a vengtute chawlh buk sak leh tui pekna siamte chu hman theih turin a hawng a. Khaw thum a tlawhnaah hian Pi Maria C.T. Zuali chuan, ei leh bar thar chhuah kawnga intodelh a pawimawh thu sawiin, mipuite chu rinawm leh taima taka thawk thin tur leh engkimah sawrkara innghat mai loa mahni kutke-a din hram hram tum turin a fuih a. Mahni ei khawp mai bakah, hralh chhuah tham buh leh bal thar tum tura chahin, hmanhmawh vut vut loa tei rei peih turin a chah a. Khaw kar kawng siam mekte duat taka enkawl tur leh, faina leh hriselna kawnga tan la leh zual tura chah nghalin, an mamawhna zawnah Department lama thawktute chu pui tura an inpeih reng tur thu a hrilh bawk.
Bawrhsapin a tlawh tak khuaahte hian – Alu, Vaimim leh thlai dangte chinga zau zawka hma lak tum a ni a. In 235 vel awmna – Selam-ah Alu chin tum In 76 an in-report tawh a; In 80 awmna – Lungphunlian-ah Vaimim chin tum In 30 vel in-report tawhin, Undivided Champhai district chhungah Sial vulh khaw 20 an awm a; A.H & Vety Department chhinchhiah danin – Tualcheng khuaah hian Sial vulh chhungkaw 20 vel awmin, Sial 130 bawr vel an vulh mek a ni.