𝗟𝗲𝗵𝗸𝗵𝗮 𝗽𝗮𝘄𝗶𝗺𝗮𝘄𝗵 𝗠𝗶𝘇𝗼 𝘁𝗮𝘄𝗻𝗴𝗮 𝗹𝗲𝗵𝗹𝗶𝗻 𝗰𝗵𝗵𝗮𝘄𝗽𝘀𝗮𝗸 𝘁𝘂𝗺 𝘁𝘂𝗿𝗶𝗻 𝗕𝗮𝗻𝗸 𝗵𝗼𝘁𝘂𝘁𝗲 𝗰𝗵𝗮𝗵

Champhai District Bawrhsap Maria CT Zuali chuan, Mipui te’n Bank chhawr tangkai dan an thiam theihna tur leh, Bank kaltlanga hamthatna awm theite an hriatfiah lehzual theihna turin, lehkha pawimawh leh dilna form-te Mizo tawnga lehlin chhawpchhuahsak tum turin Bank hotute a chah.
Nimina Champhai District chhunga Bank hrang hrang hotute chuan an hmalakna leh an hmachhawp thlir hoa thutkhawm an neihah an Chairman District Bawrhsap chuan he thu hi a sawi a. Bawrhsap chuan, mi tin banphaka Banking Facilities chhawp a tul thu sawiin, Bank kaltanga hamthatna awmte a dawng tur te’n an dawn ngei theihna turin zau zawka inzirtirna kalpui a tul takzet a ni, a ti a.
Bank-a sum dah luh leh pekchhuah khaikhinna, Credit Deposit Ratio inthlau lutuk chu a ngaimawh tih sawiin, Credit Deposit Ratio tha zawk nei thei tura inhawng lehzual turin a chah a. Loan puktute pawh loan rulh ngaipawimawh tura chahin, loan rul tha lote umzui kawngah DC Office chuan Banker-te a tawiawm tlat dawn tih a sawi bawk.
He thutkhawma tarlan dan chuan September 2020 Quarter zawh thlenga Champhai District-a Bank hrang hranga pawisa dahluh leh pekchhuah khaikhinna Credit Deposit (CD) Ratio chawhrual chu 44.71 % a ni
a, June Quarter tawpa CD Ratio 42.43% aiin 2.28 % in a pung a, CD Ratio bituk zat 60% chu a phak lo a ni.
2020-2021 Financial Year chhunga Annual Credit Plan (ACP) hnuaia hnathawh thlirho a ni bawk a. Priority Sector atana target Rs. Nuai 8261.84 atangin Rs. Nuai 3174.32 (38.42 %) tihhlawhtlin a ni a, Non Priority Sector hnuaia Target Rs. Nuai 1215 atangin Rs. Nuai 892.22 (73.43%) tihhlawhtlin a ni.
Pradhan Mantri Mudra Yojana (PMMY) hnuaiah mi 134 hnenah Loan Rs. Nuai 200.49 pekchhuah a ni a. PMEGP hnuaia target 111 atanga 21 (Rs. Nuai 43), DAY-NULM/MzSRLM hnuaia Target 470 atanga 69 (Rs. Nuai 150) te, DAY-NULM hnuaia Target 85 atanga 19 (Rs. Nuai 29.60) leh PMAY/HFA hnuaia target 150 atanga 15 (Rs. Nuai 39) te tihhlawhtlin a ni.