𝗠𝗮𝗵𝗻𝗶 𝗞𝗵𝗮𝘄𝗯𝗶𝗹 𝗰𝗵𝗮𝘂𝗵 𝘁𝗵𝗹𝗶𝗿 𝗽𝗮𝘄𝗶 𝘁𝗶

𝗠𝗮𝗵𝗻𝗶 𝗞𝗵𝗮𝘄𝗯𝗶𝗹 𝗰𝗵𝗮𝘂𝗵 𝘁𝗵𝗹𝗶𝗿 𝗽𝗮𝘄𝗶 𝘁𝗶

Get real time updates directly on you device, subscribe now.

National Higway No. 6 laih meka hnathawktute laka harsatna siam an awm chungchangah, Champhai District chhunga Pawl hrang hrang aiawhin Champhai District NGO Coordination Committee chuan Khawzawl Police Station-ah FIR an theh lut a. Kawngpui siamtu te’n hna an thawhzui nghal theihna turin dipdaltu awm apiang a tul anga thianfaia hnatlan ni se, an ti.
National Highway Infrustructures & Development Corporation Limited (NHIDCL) hnuaia National Highway No. 6, ‘Seling to Champhai Double Lane’ kawngpui laih thar mek, Dulte leh Kawlkulh khuate’n hnathawktute laka buaina an siam chungchangah Zirtawpni khan Champhai District chhunga Pawl hrang hrang hruaitute chu Champhai MJA Press Club-ah an thukhawm a.
YMA Sub-Hqrs. Champhai President, F. Lalrinmuana kaihhruai he thutkhawmah hian, NGO-CC Chairman Lalnunmawia leh Secretary Muana Hangsing te chuan NH No. 6, Puilo leh Chhawrtui inkara kawngpui laih tur, Green Field on New Alignment nihphung leh, Kawlkulh leh Dulte khawtlangin duh lohna an lantir dan tlangpui an tarlang a. Hnathawhna hmanrua lakluh tur danbeh tuma Kawlkulh khaw chhung, Puilo khaw penga Gate an siam chu khawchhak tlangdung harsatna thlentu leh mipui hmuhsitna ni a an ngaih thu an sawi bawk. NH6 Jorabat (Assam) to Champhai hian Shillong, Delashwari, Kawnpui, Aizawl leh Seling kawng awmsa ring a, Seling leh Champhai inkar laih chhunzawm tura tih chu sorkar laipui MoRTH leh Mizoram sorkar remtih (Road Alignment Approve) anga Contractor-te hnathawk tura tih a ni tih tarlan a ni bawk.
Zirtawpni a thukhawm chuan he kawngpui laih mek ti khaihlak leh dodalna awm chu tha a ti lo va, Gateway of South East Nations kawng siam meka harsatna sukiang tur hian, a tawp thlenga tanlak a ni dawn a, tih thuanawp tum emaw dodaltute chu khawchhak tlangdung mipuiten an hmachhawn zel dawn tih an rel a. Kawngpui siamtute’n hna an thawhzui nghal theihna turin dipdaltu awm apiang a tul anga thianfaia hnatlang neih ni se, an ti a. Sawrkar laipui leh State sawrkar ruahmanna siam tawh sa thlawp chu, Champhai District mipui tihmakmawhah an ngaih thu an sawi bawk.
Kawngpui siam hnathawh hi tih khaihlak a nih lohna turin tuna hmanraw lakluhna dodaltute laka hma la zui nghal turin Khawzawl Police Station-ah FIR an thehlut a, karleh Thawhtanni (May 17, 2021) thlenga hmalakna a awm loh chuan mipui hnatlang an ko nghal dawn tih he thutkhawmah hian tarlan a ni a. Hnatlanga thawhchhuah a tul huna thawk chhuak tura lo inring turin Champhai mipui leh thalaite an ngen nghal bawk.
He kawngpui laih thar tur hian Km 30 zeta kawng a tih tawi phah dawn vang leh, darkar 6 zet hun khawhral thinnaah darkar 3 lek hun hman a nih tawh dawn avangin, mahni khawbil hamthatna thlir lo va, khawchhak tlangdung huap ngaihtuahna zau tak thlir thiam a tul tih sawilan a ni bawk a. He kawngpui hi ramro tling a nih theihna turin Khawchhak tlangdung mipui aiawha hma la zuitu tur pawl (Joint Action Committee) an din nghal dawn a ni.
Zirtawpni thutkhawmah hian Champhai District NGO-Coordination hnuaia pawl hrang hrang 16 hruaitute an kalkhawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More