𝗠𝗶 𝘁𝗵𝗶𝗮𝗺𝘁𝗲 𝘀𝗶𝗮𝗺 𝗰𝗵𝗵𝘂𝗮𝗵 𝘁𝗵𝗲𝗶𝗵 𝗹𝗼𝗵 𝗺𝗶𝗵𝗿𝗶𝗻𝗴 𝘁𝗵𝗶𝘀𝗲𝗻

Mizoram hmun dang rualin nimin khan Association for Voluntary Blood Donation buatsaihin Champhai District Hospital Blood Bank-ah Valentine’s Day pualin damlo mamawh tan thisen pek a ni.
Thisen pek hma hian C.Zaihmingthanga, Secretary AVBD kaihhruaiin Blood Bank-ah hun hman a ni a, kum tin vawi 4 Special Programme an neih thin thu sawiin, heng hunah te hian thisen pek runpui neih thin a ni tih a tarlang a.
Dr. Zatluanga, President AVBD chuan, kum 1800 tawp lamah thisen hi hlawhtling taka pek tan a ni a, Indopui 1 na atangin thisen pek hi tih chhoh tan niin, kum 1990 bawr vel atangin thisen pek hi pangngai taka kalpui a nih thu a sawi.
Tunlai khawvelah thiamna a sang zel a, mihringte taksa peng hrang hrangte chu mithiam ten thlak thlengin thlak danglam thiam tawh mah se thisen erawh chu a thlakna an la siam chhuak thei lo tih sawiin, mi inphalte thisen pek chauh chu an hmachhuan ber a ni, a ti.
Kum 2005 velah chuan District Hospital hian thla khatah thisen Unit 20 atanga 30 vel a hman thin laiin tunah chuan thlatin thisen Unit 90 atanga 100 vel mamawh a ni tawh tih a sawi a. Thisen hi a thlawna pe tu an awm avang chauh a nunna chhan a nih thin thu sawiin, tunah hian District Hospital Blood Bank a thisen an dawn hi za zela 95 chu a thlawna pek a nih thu a sawi a. Thisen pek te chu a thianghlim leh thianghlim loh uluk taka endik a nih hnuah chauh damlote hnenah thisen hi pek a nih thu a sawi bawk.
Nimin vek khan Champhai Zion Veng Branch KTP te chuan KTP Day vawi 67-na pualin Central KTP hmingin thisen an pe bawk a. Zion Veng Branch KTP te hian a hrana pe lovin Valentine’s Day puala thisen pek rualin thisen hi an pe a. Valentine’s Day pual leh Central KTP pualin thisen Unit 40 pek a ni a, mipa 27 leh hmeichhia 13 te chuan thisen hi an pe a, AVBD chuan thisen petute zawng zawng chungah lawmthu an sawi a ni.
Nimina Valentine’s Day puala Voluntary Blood Donation Camp huaihawt kha Mizorama vawi 12 an huaihawtna niin, Kum 11 (2010-2020) chhungin Valentine’s Day puala thisen pek hi unit 7342 lai a ni a.
Nimina Blood Bank hrang hranga Valentine’s Day puala thisen pek zat hi nimina unit 467 nen a vaiin Valentine’s Day pualin Unit 7807 pek a ni ta a. Nimina Blood bank hrang hranga thisen pek zat chu –

Civil Hospital, Aizawl 132
District Hospital Champhai 40
District Hospital Kolasib 36
Civil Hospital Lunglei 49
Christian Hospital, Serkawn 62
District Hospital, Serchhip 38
District Hospital, Lawngtlai 25
District Hospital, Saiha 45
District Hospital, Mamit 40
Total 467