𝗡𝗮𝘂𝘀𝗲𝗻 𝗵𝗿𝗶𝘀𝗲𝗹𝗻𝗮 𝗰𝗵𝘂𝗻𝗴𝗰𝗵𝗮𝗻𝗴 𝗶𝗻𝘇𝗶𝗿𝘁𝗶𝗿𝗻𝗮 𝗻𝗲𝗶

Nimin khan CMO Champhai hnuaia thawkte tana Reproductive Child Health (RCH) chungchang inzirtirna buatsaih chu Health & Family Welfare Board Vice Chairman, Dr. ZR Thiamsanga, MLA chuan a hmanpui.
RCH chungchang inzirtirna hi I&PR Conf. Hall, CHANEM-ah buatsaih a ni a. Dr. ZR Thiamsanga chuan thu sawiin – Clean, Beautiful and Healthy Champhai project hnuaiah hmalak tum a nih thu leh, sumdawnna hmunpui Champhai-ah faina, thianghlimna leh hriselna kawngahte tanlak zel tum a ni, a ti a. Primary leh Secondary Health Care-te chu State sawrkarin a ngaih pawimawh thu sawiin, thingtlanga chengte tan hriselna kawnga hmalakna tih changthlun a pawimawh thu leh Primary Health Care tihchangtlun lamah theihtawp chhuah a tum tih a sawi.
Tih tur tam tak la awmte hlen chhuak turin tanrual a ngai a, nausen thi leh nu nau chunga thi tirem tur te, natna tlanglawn leh hluarte tirem tura theihtawp chhuah mek a nih thu te sawiin, Sawrkar flagship program -SEDP kaltlanga hmalak tum a nih bakah, State budget mai ni lo, project-te siama hmalak chhoh mek a ni tih a sawi bawk a. Damdawi in fai inelnaah Champhai District-a damdawi inte’n dinhmun duhawm tak an nei chu fakawm a tih thu a sawi bawk.
Bawrhsap, Maria CT Zuali pawhin thu sawiin, thingtlang a changkan loh chuan khawpui pawh a changkan theih tak tak thei dawn loh avangin kal phung hrisel lo leh thlak ngaite chu thlak a hun tih a sawi a. Doctor kal khawmte chu an zir thiamna te mi dang tana mal sawmna ni tura hmang tangkai thiam tur leh, faina leh hriselna kawnga zirtirtu pawimawh tak an nih inhre thar leh turin a chah a. Kan vela awm ei leh in tur hrisel leh thate chu mipuite hrilh hriaa zawm tura puanzar kawngah tan la turin a chah bawk.
He hunah hian Dr. Lily Chhakchhuak SPO(RCH), Deputy Director(FW) leh RCH Team-te’n CMO Champhai huam chhunga Medical Officer kal khawmte chu RCH programme kal tlanga hmalakna hrang hrangte an zirtir a ni.