𝗡𝗶 𝘇𝘂𝗻𝗴 𝗰𝗵𝗮𝗸𝗻𝗮 𝗵𝗺𝗮𝗻𝗴𝗶𝗻 𝘁𝘂𝗶 𝘀𝗶𝗮𝗸 𝗰𝗵𝗵𝘂𝗮𝗸

Hnahlan khuaa Ni zung chakna, Solar Energy hmanga tui Pump hna thawh chu zawh fel thawkhat niin, nimin chawhma khan PHE Dept. Engineer-in-Chief, Er C.Lalremsiama chuan tui Pump chhuahna tura ruahmante a that leh that loh a enfiah a. Hnahlan khua thlengin tui hi pump chhin a ni.
Hnathawh enfiahtu Engineer-in-Chief, Er C.Lalremsiama chuan, Hnahlan khaw tuipekna tur- Hnahlan Water Supply Scheme (Solar Pumping) chu kum kal ta February atanga thawh tan a nih thu leh, kum 3 chhunga thawh zawh tura ruahman ni mah se, Covid-19 hripui leng karah pawh kum khat chhung leka thawh zawh a nih thu a sawi a. He hna thawh nan hian NABARD atangin Sum Rs. 10,65,57,000 ruahman a nih thu leh, he project hian kum 20 chhung, kum 2040 thlenga Hnahlan-a mipui awm tura chhut – mi 8383-te chu chawm thei tura duan a nih thu a sawi bawk.
Hnahlan Water Supply Scheme (Solar Pumping) hi Hnahlan khaw dai -Kurung lui mawng atangin tui pump-na chhawng thumin siam a ni a. Tui hi Hnahlan khaw lu-ah pump
chhoh a ni a. Nimin khan hlawhtling taka tui hi Hnahlan khuaah pump thlen a ni a. Nimin atang khan he hna thawktute hian kum 5 chhung an vil zui ang a, hnathawh tur hi la zofel chiah lo mah se Hnahlan mipui tan tui pek tan theih a ni tawh ang.
Engineer-in-Chief hi Chief Engineer, Er. Lallunghnema; Er. C.Lalhmahmachhuana SE, Champhai Circle leh Official dangte bakah, Hnahlan khawtlang hruaitute leh thuthar thehdarhtute’n an tawiawm a ni.
PHE Department kaltlang hian Ni zung chakna hmanga tuilak hi Kelkang, Chiahpui leh Mimbung ram bakah Mizoram khaw 30 tan hmalak a lo ni tawh a, mipuiin an chhawr tangkai hle.