Categories
News
ni 19.1.2018 (zirtawpni)

LITERACY DRIVE  NEI:
         Champhai District Working Committee on Literacy Drive buatsaihin nimin khan Kahrawt Community Hall-ah Total Literacy Drive leh Animators te training chu hawn a ni a, Pu Vanlalngaihsaka Champhai DC chuan a hmanpui.
         He hun hi Pu C.Lalbiakzauva, DEO RMSA leh Committee Chairman chuan a kaihhruai a, khuallian Pu Vanlalngaihsaka, Champhai DC
chuan thu sawiin, India rama ziak leh chhiar tamnaah Mizoram chu kan sang hle a. Ziak leh chhiar thiam lo la awm zingah naupang leh thalai, thiam thei tura ngaihten an thiam theihna turin sorkar chuan hma a la a. A thawktute hmalaknain chu chu kan hlen chhuah theih ngei ka beisei, a ti a, ziak leh chhiar thiam lo zingah kum 7-14 inkarah mi 52 leh kum 36-55 inkarah mi 920 an awm chu ngaihtuah ngun a tul thu a sawi a. Ziak leh chhiar an thiam loh chhan hrang hrang zingah a chhan tam ber chu zirchian a, hriatfiah law law a tul thu tarlangin, chuta tang chuan hmalak zel dan tur a chiang ang, a ti a, kalkhawm animators te chu he training hlawkpui ngei tur leh an zir chhuahte tangkai taka hmang turin a fuih a, total literacy drive hi a hawng nghal a ni.
       Nimin training-ah hian Pu PC Lalremsiama leh Pu Vanlalruata, Directorate School Education Dept ten zirtirna a pe a ni.

B THLENGA HRIATRENGNA TUIPUIRAL AH:
       B.Lalthlengliana Memorial Tuipuiral  Annual Meet, Sazepa neih mekah nimin khan football semi final khelh a ni.
        Nimin  inkhel hmasa berah meet thlengtu Sazep chuan 3-1 in Samthang an hneh a, Farkawn chuan si khat faiin Zawlsei an hneh bakah Sesih leh Khuangthing te an inkhel bawk a ni.

MIDDLE SCHOOL ZIRLAI TAN:
        SSA Mission, Champhai District-in Rashtriya Avishkar Abhiyan kaltlanga Govt. Middle School zirlaite tana inelna an buatsaih ni hnihna atan nimin khan Vengsang YMA Hall-ah Mathematics Quiz Competition neih a ni.
        He quiz competition hawnna inkhawm hi Pu Lalhminghlua, Dy DPC chuan a kaihhruai a, khuallian Pi K.Lalsiamliani, DPC SSA chuan, he quiz competition hian zirna lam, a bikin mathematics-ah zirlaite tan rah tha chhuahin an zirna kawng puitu a nih ngei a beisei thu a sawi a. DPC chuan, RAA chu mathematics leh science-a naupangte an tui theihna tura India ram hmun hrang hranga kalpui a nih thu a sawi a. He quiz-a tel leh a chhimtu zirlaite chu tangkai taka hman turin fuih bawk a ni.
        Middle School Level Mathematics Quiz-ah hian SSA block pali atangin team 12 an tel a, heng mite hian nimin khan an zirlai behchhanin intihsiakna an nei a ni. Intihsiakna hi nimin khan zawhfel nghal niin  Pakhatna – Govt. KM M/S, Khuangleng, Pahnihna – Govt. Bungzung M/S, Pathuman – Govt. Tlangsam M/S bakah Govt. Pawlrang M/S leh Govt. Roseland M/S ten Cosolation Prize an dawng bawk.

BALL INPETSIAK :
      CDFA buatsaih Republic Day Football Tournment chu nimin khan khelh chhunzawm a ni a, quarter final lut te a hriat kim ta.
      Nimin a inkhel hmasa ber Tlangsam leh Muaikawl te inkhelah chak zawk an awm lova, goal hnih ve ve inpein an inthahthen a ni. Inkhel hnuhnung zawk, MFC Melbuk leh Kahrawt te pawh si khat ve ve inpein an inhneh tawk bawk. Vawiin hian match 3 khelh a ni dawn a, second division ah Tlangsam leh Zote, ZOFEC Zokhawthar leh Mualkawi te inkhelin, first division-ah Vengsang FC leh Vengthlang North te an inkhel ang.
        Vawiin atangin inkhel en man siam a ni a, mi pakhatah cheng 20 zel entry ticket hi lak a ni dawn a ni.