Categories
News

Champhai – Tualchhung Chanchinthar ni 11.6.2018 (thawhtanni)

KENKAWH LOH THUPEK IN ZAWM HLAWH LO :
Champhai leilet zawla kudam sak, thiah tura thupek chhuah chu hmalakna a la awm lo.
Champhai leilet zawl hi Agriculture kaihhnawih atan chauha hman tura tih niin hemi piah lama hmalakna – kudam leh in sakte chu thiat turin kumin kum tir khan Champhai District Magistrate chuan thupek a lo tichhuak tawh a, leilet zawla In leh kudam neitute hian thla hmasa ni 8 khan Court an thlenpui hnuah a neitute hi thiah sak an nih loh chhan sawifiah tura lehkha pek an ni a, insawifiahna hun atan hian ni 15 chhung hun pek niin insawifiah hun hi tun thla tir khan a tawp a, vawiin thlengin kudam thiah a la ni lo a ni.
Champhai leilet zawl hi Mizoram Revenue Laws hnuaiah Agriculture lam kaihhnawiha zuah a ni a, ram neihna an pek pawh Agriculture LSC, Periodic Patta leh Garden Pass te an ni a, hemi tlawhchhan hian thupek hi tihchhuah a ni . Kudam leh In satute chuan kum 100 chuang lo neih tawhna a nih avangin rma leilung a chhia a, a ram hi sumdawnna kaihhnawihah an buatsaih ta nia sawi a ni a, an hmalakna avang hian Champhai hmel lanna pakhat leilet zawl hi a danglam chak hle a ni.
Leilet zawla dan lova kudam sakte hi thiah a nih theih nan tlawmngai pawl pakhat Champhai Nature Conservancy te chuan thuneitute hnenah an lo thlen tawh thin a, an hmalakna hi Champhai Thalai pawl chuan an thlawp thu thuchhuah siamin an tarlang tawh bawk. Hetihlai hian kudam leh In, Mizoram Agriculture laws kalha sak, thiat tura thupek chhuah tawh hi bawhzui a la ni lo thung.

GREEN MIZORAM DAY :
Vawiin chawhma dar 11 hian Mualbuhvum, Zote Road ah Green Mizoram Day hawnna hun hman ani dawn a. Hehunah hian Champhai a Department hrang hranga thawkte chu tel tura beisei an ni. Hawnna hun hman zawh hian hmun hrang hrangah insem darhin thing chi hrang hrang phun a ni ang.

MODERATOR CHAMPHAI AH :
Mizoram Synod khaipa Moderator Rev. F. Lalrinnunga chuan Pathianni hmangin Champhai Vengthlang Pastor Bial a hlawh.
Moderator Rev. F. Lalrinnunga hi Inrinni khan Champhai rawn thlengin Vengthlang Pastor Bial chhunga Kohhran hrang hrangah thusawina hun a hmang a ni. Rev. F. Lalrinnunga hi Hnahlan Pastor Bial a Pro Pastor hna lo thawk tawh thin a ni.