Categories
News

Champhai – Tualchhung Chanchinthar ni 21.6.2018 (ningani)

HEROIN HAWNG 11 MAN :
Nizan hmasa khan Champhai Khankawn Police Check Gate ah Zokhawthar to Aizawl Maxi Cab pakhat atangin Heroin Hawng 11 leh a neitu ni a puh hmeichhe pakhat chu Police ten an man.
Champhai Police hotute hnen atanga thu dawn danin, Zokhawthar to Aizawl Maxi Cab a chuangte an enfiahna lamah Zarzosangi (52) d/o Vanhnuaithanga (L)  Sazep khua ni a insawi hnen atangin Heroin Hawng 11 (Gram 143) an man a. Heroin neitu chuanna Maxi Cab Driver hi he ruihhlo chungchangah hian inhnamhnawihna a neih loh avangin thubuai siamsak a ni lo thung. Heroin man tak hlut zawng hi tualchhung hralhna a chhutin Rs. 5,50,000 man a ni.
ND&PS 21 (b) tlawhchhan a man Heroin man tak Hawng 11 (Gram 143) hi kum 10 lungin tan leh Rs. nuai khat thleng chawi tura hremna pek theih a ni.
Zarzosangi hi ND&PS Act tlawhchhanin thubuai siam sak a ni a, nizanhmasa khan Champhai Plice Station lock Up ah tantir a nih hnuin nimin khan District Court ah hruai niin Champhai District Jail ah dah luh nghal a ni.

NGOPA AH KUTHNATHAWKTUTE PUALIN  HUN HMANG :
Niminpiah khan Ngopa Zawlbukah School Education Minister H. Rohlun ho in Kuthnathawktute puala Programme buatsaih chu hman ani a. He hunah hian Ngopa khua leh a chheh vel thingtlang khaw hrang hrang atanga lo kalkhawm Kuthnathawktute hnenah NEDP tanpuina kaltlangin Puanthui khawl leh Mistiri Bungrua thahnem  tak sem a ni.
He huna khuallian School Education Minister H. Rohluna chuan NEDP tanpuina dawngtute chu an bungraw dawn te tangkai taka hmang turin a chah a. Sawrkarin bungrua a semchhuah dawngtute chuan an thil dawn te chu eizawnna kawnga bultanna atan leh midangte tana malsawmna thlenna hmanruaah hmang thei se a lawmawm hle ang a ti. Tunah hian MLA bial hrang hrangah NEDP kaltlangin Mistiri bungrua leh puanthui khawl te hi sem chhoh mek a ni.

THINGPHUN SUASAM :
Helipad kawnga District NGO CC in Tlaizawng an phun chu mi kuthlei ten an tichhiat avangin Tlaizawng phun that leh tum a ni a, thingphun sawisa tawh lo turin District NGO CC chuan a ngen bawk a ni.

TUI PEKNA TUR :
South Khawbung Water Supply Scheme hna chu 88% zawh fel tawh a ni. PHED in sawrkar laipui leh State Sawrkar hnuaia hnathawh hrang hrang, May thla thleng, Achievement Report a a tarlan danin NLCPR hnauia Rs. nuai 827.38 senna tur South Khawbung Water Supply Scheme hi hna zawng zawng 88% zawhfel tawh a ni, hnathawh nan hian Rs. nuai 755.91 an seng tawh a ni. 10% GBS hmanga Rs. nuai 2497 senna tur Greater Khawzawl Water Supply Scheme hna chu 65.49% an zo tawh a, Rs. nuai 1853.65 an hmang tawh a ni. Biate Water Supply Scheme Rs. nuai 1364.67 senna turah Rs. nuai 409.40 sengin hnathawh tawh a ni a, hna hi 39.38% an zo fel tawh a ni.

GAS BUR 16884 LO THLENG TAWH :
Kumin chhungin Champhai Mizofed LPG ah Gas bur 16884 a thleng tawh.
Kumin January leh May thla chhungin Champhai Mizofed LPG ah Gas Truck Trip 56 phurh thlen tawh a ni a, a bur te chi 16380 leh bur lian chi 504 a thleng tawh a, Champhai bialah hian tun dinhmunah Consumer chhungkaw 14608 awm mek an awm mek a, za zela chhutin Champhai in Gas a thlen tawh te hi chhungkaw pakhatin Gas bur 1 zel chang theuh ang a ni a, thla tin Truck trip 11 rawn phurh thlen ziah ang in bur 3376.8 thleng ziah ang a ni. Tun thla June bikah hian Gas Truck trip 7 phurh thlen tawh niin Gas bur te chi 1944 leh a lian chi 144 a thleng tawh a, kawng a thlang mek a awm bawk.

PMUY hnuaiah a thlawna Gas Connection chu tun thla tir atangin an pechhuak a, chhungkaw 170 pek chhuah tawh niin pek chhuah tur lut kallai mek a awm nual bawk a, remchan dan a zirin a tlawna Gas Connection hi pek chhuah zel ani dawn a ni.