Categories
News

Chemte hmanga mi beitu Court in achungthu rel

Nimin khan H. Lalhmunsiama S/o H. Zohminga, Zawlbuk Venghnuai chu Addl. Sessions Judge, Special Judge ni bawk R. Vanlalena chuan Kum 7 chhung hrehawm taka jail tang tur leh pawisa Cheng 5,000/-chawi turin a hrem a. Pawisa chawi tur hi a pe thei lo a nih chuan Kum 1 dang Jail a tan belh leh ang.
Thu dawn danin, Ni 12.11.2014 chhun dar 12 vel khan Lalkhawngaihi D/o R.Lalzuala, Zawlbuk Veng, Biate khua chu anu damlo awmpuiin inah a awma hetihlai hian  a pa R.Lalzuala chu hna thawkin a chhuak a. Chhunlai takah chuan H.Lalhmunsiama S/o H.Zohminga, Zawlbuk Venghnuai, Biate khua a awm hi rawn lut ve in ngawi rengin a thu ve a. Chutia H. Lalhmunsiama hian Lalkhawngaihi hi man thutin a nghawngah a rek bet a,  chawhmeh channa chemte in a nghawnga zai a tum ta mai a.
Mahse Lalkhawngaihi hi lo inveng ve in leh, a nu leh a nu thiannu ten lo chhan vatin, an thawmah midang an rawn tlan lut ve nghal a. Mipa dang lo tlan lut ve te chuan H.Lalhmunsiama chu man betin a chemte ken pawh an laksak ta a, nunna chan loin an  inchhan thei hram a ni. A lo in venna lamah  Lalkhawngaihi hian a banah chemte hliam leh a nghawngah na lutuk lo-in chemte-a thai rin a tawk a. He thil thleng avang hian R. Lalzuala chuan Khawzawl Police Station-ah FIR a thehlut  nghal a. Khawzawl police chuan tualthah tum thubuai chu H. Lalhmunsiama lakah hian an siam nghal a.FIR thehluttu R. Lalzuala te chhungkua chuan H. Lalhmunsiama hi tum hnih ngawt an ngaihdam tawh thu ziakin Court-ah an thehlut a. A tum hnihna ni 21.6.2019 a an thehluhah chuan President, Village Council Court, Biate leh President YMA, Biate Branch te bakah  Secretary, MHIP Biate ten hriatpuiin an hming an ziak a, seal an chhu thlap bawk a. H.
Lalhmunsiama dinpuitu Ukil pawhin he  inngaihdamna thu hi sawi langin thiltisualtu chu hremna pek belh lo turin a dilpui bawk.
Thuhretute thusawi te, Doctor report te, Case
I.O. thusawite leh inngaihdamna lehkha te chik taka ngaihtuah a nih hnuah roreltu chuan thiltisualtu hi hremna pek belh ngei chu tha-in a hria a. A tuartu chhungkaw lamin thilsual titu an ngaihdamna chu pawmpui tho siin, thilsual titu hi kum 7 chhung hrehawm taka Jail tang tur
leh pawisa Rs. 5000/- chawi turin hremna a pe ta
a. H. Lalhmunsiama hi a tir lamah Jail tan tir niin, thla riat vel hnuah bail-a chhuah tir a ni a. A chungchanga hremna tur thupek court- in a puan tak hnu hian H. Lalhmunsiama chu Jail-ah
thawn luh leha ni ta a ni.