Categories
News

CTP ten Footballer chawimawi

Nimin khan Champhai Thalai Pawl te chuan Champhai ti hmingthatu Football Player-te an chawimawi.
He hun Hotel Hranga Plaza-a neih hi Champhai Thalai President chuan a kaihruai a, Pu C. Lahnunpuia MJA President chuan thusawiin Champhai Thailai Pawlte’n chawimawi phu chawimawi nachang an hria chu lawmawm a tih thu a sawi a. Hmanlaiin khawtinin Pasaltha a nei thin a, khawtlang aiawhin Lal-in chawimawina an pe thin a, chawimawina a pek thin Nopui an dawm kha thil roipui tak ni lo mahse chawimawi an nih nachhan zawk kha a ropui lai kha a ni a, vawiina Champhai Thalai Pawlin an chawimawina pek chu thil ropui tak ni lo mahse, chawimawi an nihna zawk chu ngai thlu turin a chah. Pu C Lalhnunpuia chuan India ram mipui maktaduai telin an en theih tura Champhai tui liak ngei an tel pha chu ropui a tih thu a sawi a, mite en ber an nih avangin mite en tawn theih tura nung tur leh Mizoram thalaite kaihruai thei tura an nun uluk taka hmang turin a chah bawk.
He hunah hian Champhai Thalai Pawl hruaitute chuan fuihna an sawi bakah Footballer-te hnen atangi thusawi ngaihthlak a ni a, Footballer chawimawite hian Hlawhtling tura pawimawh ber chu Tumruhna, taimakna leh teirei peihna a nih thu sawiin Football khel tur pawhin lehkhathiam hmasak a pawimawh ber an tih an sawi bawk.
Champhai Thalai Pawlin Chawimawina an pek te hi  Lalthuammawia Ralte FC Goa, Loan-a East Bengal-a khel mek te, Lalruatthara Karela Blaster leh Lalchhawnkima Mohun Bagan te an ni.