Categories
News

Kohhran , KṬP & Kohhran Hmeichhia ten Jubilee lawm

Khawzawl Electric Veng Presbyterian Kohhran in an Kohhran kum 25 tlin, Silver Jubilee lawmna, kar kalta Inrinni atanga an neih chu nizan hmasa khan a tiak.
Inrinni khan Kohhran Hmeichhe Silver Jubilee puala hun hman a nih hnuah Thawhtanni khan KTP Silver Jubilee puala hun hman leh niin, niminpiah khan Kohhran Silver Jubilee lawm leh a ni a. Inrinni-ah ruai thehin, Thawhtanni khan Vawk leh Ar nen ruai an theh leh a, niminpiah tlai khan nawn leh a ni. Thawhlehni chawhma khan Biak In kawtah Silver Jubilee lawmna dar vua in Khawzawl
khawpui chhunga Pastor, Bialtu Pastor lo ni tawh thenkhat leh Kohhran Puipa ten dar vawi 25 an vua a, hemi hnu hian Bialtu Pastor Rev. F. Lalsangkunga’n Jubilee Lungphun a hawng a.
Rev. Lalrammawia, Chaplain, Falkawn Referral Hospital in Silver Jubilee Hall a hawng leh a ni. Hemi hnu hian Biak In lamah hun hmang zui
nghalin, Kohhran zaipawlte an zai bakah Upa Lalthanliana’n Kohhran report a pe a, Rev. Lalrammawia’n thuchah a sawi a ni. Chawhnu lamah Biak Inah leng khawmin, tlaiah Jubilee ruai an theh a. Nizan hmasa khan Jubilee lawmna inkhawm hnuhnung neiin, Jubilee lawmna hi a tiak ta a ni.
Electric Kohhranah hian tun dinhmunah chhungkua 75, Dan zawh kim 200, Mipa 190, hmeichhia 202 awmin  kohhran member 392 an awm a. Kum 1995 khan Kohhran Upa hmasa ber ni turin Upa Darhnuna leh Upa K. Lalsanga te thlan an ni.