Categories
News

Hmun dang rualin World Population Day hmang

HMUN DANG RUALIN WORLD POPULATION DAY HMANG :
Kum 1989-a Governing Council of the United
Nations Development Programme-in khawvel mihring pung chak tak avanga harsatna thleng thei thlir chunga kum tin July ni 11-a World Population Day hmang tura a ruahman angin, khawvel hmun dang rualin nimin khan National Health Mission, Champhai District huaihawtin CMO Conference Hall, Champhaiah World Population Day pualin hun hman a ni.
World Population day hmanna hi Dr. R Lalawmpuia, CMO Champhai chuan a kaihruai a. Kum 1989 atangin kum tinin World Population day hman a nih thu a sawi a, mihring kan pun chak em avanga harsatna kan tawh lohnà tur leh kan  hriselna-in a tuar loh theihna tura ruahman a nih thu a sawi bawk.
C.Lalramengi, DPM chuan thu sawiin, world
population day-in a tum ber chu Chhungkaw
ruahmanna fel tak neih leh chhungkaw hrisel neih a ni, a ti a. Mihring ka pung chak em em a, kan chenna khawvel a thang si lo va, Mihring pun chak avangin hriselna a tlahniamin Nu, nau chunga thi an tamin, retheihna a lo pung bawk a ni, a ti. Khawvelah mi maktaduain 700 zet in kumtling lovin nupui pasal an nei a, hei hian nau leh naute hriselna a ti tlahniam em em a ni, a ti. Kum tling ngeia pasal neih te, kum 21 tlin hnua fa neih te, chhang khat tawka fa neihte hi nu leh naute hriselna atan a that thu te, Chhang khat tawka fa neih hi nu leh nau hriselna a nih thu te, Nau nei hlim leh nau chhiat hlima indanna hman nghal chu thil hlauhawm a nih loh thute a tarlang a. Chhungkaw ruahhmanna fel tak nei turin indanna chi hrang hrang chu Daktawr rawn chunga hman thin tur a nih thute a tarlang a. Kalkhawmte chu anmahni awmna hmunah theuh midangte zirtirtu ni thei turin a chah bawk.

Kumin World Population Day thupuiah hian “Nu leh Nau an lo hrisel zawk nan chhungkaw ruahmanna fel tak nei rawh” tih hman a ni a. World Population Day pual hian thla khat chhung hun hman a ni ang.