Categories
News

CHAMPHAI ZAWLA GODOWN SAK ENFIAH DAWN

CHAMPHAI ZAWLA GODOWN SAK ENFIAH DAWN :
Champhai District Additional DC, Alexander V.
Chongthu kaihhruaiin nimin khan Champhai khawpui chhunga ritphur lirthei dah lailawkna tur ngaihtuahin DC Conference Hall-ah thutkhawm a ni a. Champhai zawla Godown sakte chu Revenue Department lamin an enfiah mek a, a tul angin dan anga hmalak tum a ni tih tarlan a ni bawk.
Nimin thutkhawmah hian Faina leh thianghlimna kenkawh zui zel a nih theihna tur leh ritphur lirthei vanga khawpui chhung lirthei chevelin harsatna a tawh mek chungchang thlirho a ni a. Thianghlimna vawn zui zel a nih theihna tur te, lirthei dahkhawmna mumal awmlo vanga kawngpui tawt leh mipui tana hlauhawm zualte chu sutkian a nih theihna turin ruahmanna siam a ni.
Indo-Myanmar Border Trade Point behchhana
bungraw lut leh chhuak phurtu lirtheite avanga Champhai khawpuiin harsatna a tawh mekte sutkian a nih theih nan hian Champhai Khankawn Police Check Gate leh Zotlang inkar kawngpui kam lehlamah chauh lirtheite dahkhawm rih phawt tha tih a ni a. Kawngpui kama Truck dahna tur chin hmunhma bithliah leh inthiarna siamna tur hmunte enfiah tura rel a nih bakah, lirthei awmkhawm leh a enkawltute himna leh kaihhruaina lo kengkawhtu tur ruangam pawh duan nghal a ni bawk.
Champhai khawpuiin ritphur lirthei dahkhawmna (Truck Terminal) a neih rih loh avangin Champhai leilet zawl huama Veng hrang hrang kawngpui kamah bungraw dah lailawkna (Godown) 30 dawn siam a ni Heng lirtheite avang hian hmun thenkhatah kawngpui a.chhiat phah thu leh lirthei dang vakvel ten harsatnan an tawh thu tarlan a ni a. Mipui himna atan a hlauhawmba nih theih bakah khawpui chhung thianghlimnanthleng a nghawng tih sawilan a ni bawk.
Heng ruahmannate hi chak taka kalpui a nih theihna turin Sorkar thuneitute leh Champhai
Zotlang, New Champhai, Tlangsam leh Zote
khawtlang hruaitute bakah tlawmngai pawl leh Media-te nen a hmuna enfiah ni se, tiin nimina thukhawm chuan a rel a. Lirthei dahkhawm lo kilkawi tur hian Champhai Zotlang Goods Vehicles Association (ZVGA) te tlawmngai tura beisei niin, lirthei vakvelte harsatna sukiang tur hian tualchhung atang leh NCC lam atangin Traffic Warden te duty thei tura beisei leh ruahmanna siam ni se, an ti.
He thutkhawmah hian District Magistrate in
Champhai Leilet zawl, WRC huam chhunga In sak leh bungraw dahna, Godown sak chungchanga khapna dan a chhuah tawh chu enfiah leh tura tih a ni.
Nimin thutkhawmah hian Addl DC hi Official lam atangin Lalengliana, Champhai District DSP; Zoremthara Ralte, SDO (Sadar) leh DIPRO Dr Lallawmkima Thangluah ten an tawiawm a. Khawtual lam atangin Zotlang leh Tlangsam khawtlang hruaitute bakah Media mite an tel a ni