Categories
News

MINISTER IN A BIAL CHHUNG KHUA TLAWH

MINISTER IN A BIAL CHHUNG KHUA TLAWH :
Nimin khan Law and Judicial Minister Pu TJ Lalnuntluanga chuan Zokhawthar leh Melbuk khuate tlawhin khawtlang mipui mamawhte, ramri Inkalpawhna leh insumdawntawnna te Sawrkar official-te nen an  enho a ni.
Minister chuan thusawiin  Zokhawthar leh Melbuk te  chu Zoram laili Zofate inkalpawhna hmun pawimawh tak a ni, a ti a. Zofate inpumkhtna leh inpawhtawnna turin  Champhai leh Tahan inkarah Bus service tuma hmalak anih thu leh inpumkhtna leh inkalpawhna a awm loh chuan inhlat a awl thu a sawi a.  Immigration and Integrated check post leh Land Custom Station changtlung zawk siam tura hmalak anih thu a sawi bawk. 
Law Minister leh Champhai South bialtu MLA nibawk chuan mipui banphak awlsam taka thuneitute nena  indawrtawn theihna hun Public Interview buatsaih chuan khua leh tuite tana Sawrkar inchhawp hnaih tumna a tilang a ni, a ti a.Public interview hmangin inrawntlanna Department kaihhnawih hotute nen neih anih dawn thu leh  thil tih theih leh hmalak dan turte sawiho zel a nih tur thu a sawi a. Mahni khaw  tualzawla harsatna thlen chu tih danphung anga siam a, dan ang thlapa hmasawnna hna thawh anih theihna tura Department hotute nena inrawmkhawm hun buatsaih chu chhawr tangkai turin mipuite a chah a. Minister chuan khawtlang mipuite chu hnathawh tur inkawhhmuh a tanho a, thil tihtheih tur angte en ho zel chunga thinlung hlemhletna tel lova dikna leh rinawmna nen taimak chhuaha  ram siamthat puiah a sawm nghal a ni.
Public Interview hmang hian khawtlang mipuiten mamawh leh harsatna an neih te Minister leh Official te hnenah thlenin, Sawrkar Department hotuten an harsatna sutkian dan turte leh theih anih leh nih lohte an sawifiah zel a ni. Law Minister hian Myanmar Immigration Office, Khawmawi Myanmar ami pawh tlawhin thawktute hnathawh dan leh hmalakna te a en a. Mizoram lamah pawh  Passport neite tan e- Visa pek   anih theih dan turte leh dan ang thlapa  awlsam zawka inkalpawh leh insumdawntawnna neih anih theihna tur chungchang official-te sawipuiin  e-visa pek anih theihna tura a tul anga hmala turin a chah a ni.
Pu TJ Lalnuntluanga hi  Pu Alexander V.Chongthu, Addl DC; Pu Rex Zarzoliana, SP Champhai;  Pi Ethel Rothangpuii PD DRDA; Pu Zoremthara Ralte, SDO Sadar/DTO; Pi Rebecca Laldinmawii Hrahsel, BDO; Dr Lallawmkima DIPRO; Dr Lalawmpuia CMO; Dr B.Zonghinga DVO; Pu C.Lalbiakzauva DEO; Pu Lalbiakthuama, EE PWD; Pu J.Kapkima, EE PHE ten an tawiawm a ni.