Categories
News

MIPUITE TAN DAMDAWI MANTLAWM

MIPUITE TAN DAMDAWI MANTLAWM :
Mipuiten man tlawm zawka Damdawi an lei atheihna tura Sorkar laipuiin ruahmanna a siam, Pradhan Mantri Bhartiya Jan Aushadhi Kendra (PMBJAK) hmanga Champhai District tana
Champhai Town Multipurpose Cooperative Society (CTM-PACS)-in Generic Drugs Store a siam chu nimin zing khan Champhai District Senior Medical Officer Dr. R. Lallianmawia’n a hawng.
Champhai Vengthlang Pu Chalbawia Building-a CTM-PACS Variety Store sira he Generic Drugs Store hawnna hun hi PACS Chairman HS Vanlalfakzuala’n kaihruaiin, Senior Medical Officer Dr R. Lallianmawia chuan, Sorkar laipui ruahmanna anga Champhai District mipuiten man tlawm zawka Damdawi an lei theihna tura Generic Drugs Store hawn a ni ta chu lawmawm a tih thu a sawi a. ‘Nang malsawmna ni ang che’ tih thupui a hmangtu Champhai Town Multipurpose Co-operative Society-in hetiang Dawr a hawng hi thil inhmeh tak leh mipui tana vanneihna rahbi thar a ni, a ti.
SMO Dr. R.Lallianmawia chuan Generic Drugs Store a damdawite hi Damdawi Dawr danga
zawrhte nen a thawh chak dan in-ang reng a nih rualin, damdawi landan tih mawina leh ei a nawm zawkna tura thil dang pawlhsawp ve loh a nihna chiah hi a danglamna a ni, a ti a. Mirethei leh khawsak harsa zawk-ten man tlawm zawka Damdawi an lei theihna tura Sorkar laipui ruahmanna a nih angin, Sorkar hriatpui leh dan ang thlapa damdawite hi zawrh a nih vangin sawiseltu an awm a nih pawhin thin-hrik miah loh tur a nih thu a tarlang tel bawk.
Champhai Town Multipurpose Co-operative
Society Limited (CTM-PACS) hi kum 2012 khan
ding tanin, member 150 vel an ni a. Nikum khan Mizoram chhunga Society hlawhtling leh thawk tha ber lawmman a dawng a. Mizoram Apex Bank hnuaiah Mini-Bank hawngin,  Champhai HSS changtlung tak a kalpui a. Mipuiten man tlawm zawka bungrua an lei thèihna turin CTM-PACS Variety Store a hawn bakah zirna lam tih hmasawnna turin Nursery atanga College’ thleng zir theihna tur Vavudil Project a kalpui mek bawk.