Categories
News

MJA CHAMPHAI DISTRICT TEN KHAWZAWL DC TLAWH

MJA CHAMPHAI DISTRICT TEN KHAWZAWL DC TLAWH :
Champhai District MJA te chuan nimin chawhma dar 11 khan Khawzawl District Bawrhsap Pu H. Lianzela Office an tlawh a. Champhai DIstrict MJA te hi an President Pu C. Lalhnunpuia`n ho in DRDA Project Director Pi Ethel Rothangpuii MJA te hi a tawiawm a ni. 
Khawzawl District Bawrhsap Pu H. Lianzela Office Chamber ah in khawm hona an nei a. Champhai DIstrict MJA President Pu C. Lalhnunpuia chuan Khawzawl District chu Champhai District aṭangin indang mahse Champhai District hmalakna kawng tam tâkah inthen hran theih ala nih loh avangin District Pahnih Bawrhsap te chu thawhhona tha an mamawh a, Champhai SP in Aizawl leh Champhai inkara lirthei rit phur tlan dan tur ruahmanna a siam te pawh kan zavaia that tlan nâ tur a ni a. Hetianga District pahnih that tlanna tur a ruahmanna awm ṭhin leh hmalakna awm ṭhin ah te District Pahnih ten in hriatthiam tawnna nei a thawhhona tha tak an neih chu Champhai District MJA te duhdan a nih thu a sawi a. MJA chu Sawrkar leh mipui inkara rawngbawl hna thawktu a ni tih sawiin Khawzawl khawpui chhungah MJA in Press Club a neih ve theihna turin Khawzawl District Bawrhsap chu hmalakpui turin a ngen nghal bawk a ni. 
Khawzawl District Bawrhsap Pu H. Lianzela pawhin Champhai District MJA ten an tlawh chu läwmawm a tih thu leh District Pahnih thawhhona tha tak neih chu an ni lam pawhin an ngai pawimawh a. Khawzawl a Press Club din chungchangah erawh bul intan thar chiah an la nih avangin tunah rih chuan engchennge an tih theih tih pawh an la hriat loh thu leh hemi chungchang hi Sawrkar thuneitute leh Khawzawl khawtlang hruaitute a sawipui dâwn tih a sawi a. Pu H. Lianzela chuan an dinhmun pawh he hunah hian sawiin tunah rih chuan DC Office Establishment chu an ngaih pawimawh ber niin Staff 48 nei tur an nih laiin Staff awmsa 2 an nei a. Deputy Chief Minister Bial leh Bialtu MLA ni bawk hmalakna in Officer leh Staff pawh an neih chhoh belh zel a. Superintendent leh stenoid te pawh pek an ni tawh a, SDC,  Assistant, Driver,  4th Grade leh LDC pawh an neih belh thuai thu a sawi. Staff Quarters hrang hrang sak mek hi sak zawh thuai a nghahhlelh thu sawiin Officer leh Staff ten harsatna an tawh avangin Staff Quarter sak hna thawh mek chu Contractor ten sâ zo thuai se an duh thu a sawi. 
District Bawrhsap chuan Line Department te nen Coordination ṭha tâk neih chu an ngai pawimawh tih sawiin. Development lo lut reng reng hriatpui vek a thawh hona ṭha tâk nei chunga hmalak tlan chu an duh ber a ni tih a sawi lang bawk. Faina kawnga hmalakna pawh an ngaih pawimawh hmasak tur zingah a tel thu sawiin Media te chu thawhho puiah a sawm a ni.