Categories
News

MOTOR TLAN DAN TUR THUPEK THAR

MOTOR TLAN DAN TUR THUPEK THAR :
Champhai District Addl SP Francis Lalnuntluanga Ralte chuan nimin khan, thla thar, September thla chhunga Champhai leh Keifang inkara lirthei tlan dan turah thupek thar a tichhuak.
Thupeka tarlan dan chuan, September ni 1 atanga ni 30, 2019 chhungin motor lian, 407 chin chunglam (Ke 6 nei chin) tan he kawngpui hi One Way-a hmangin intlanchhawk tur a ni. Ni inkawp kim lo (odd days)- ah Aizawl atanga Champhai pan tur,  motor lian tan, zan dar 12:00 atanga a tuk zan dar 12:00 thleng kawngpui zuah a ni ang a. Ni
inkawpkim (even days)-ah Champhai atanga Aizawl pan tur lirthei lian an tlan ve thung ang a, zan dar 12:00 atanga a tuk zan dar 12:00  thleng. Champhai lam atanga motor lian chhuk turte chu an tlan ni apiangin Khankawn Police check gate chu chawhma dar 10:00 aia tlai lovah an paltlang ngei tur a ni a. Keifang paltlang nan zan dar 12:00 thleng hun an nei ang a. Hun bituk chhunga an paltlang  hman  lo a nih chuan kawngsir remchangah an chhuk leh hun tur nghakin, motor dang kalna tibuai lo turin an ding tur a ni ang.