Categories
News

THIL DIKLO TI TURA NAWR LUILO TURIN CHAH

THIL DIKLO TI TURA NAWR LUILO TURIN CHAH :
Nimim khan Law and Judicial, EF&CC, Transport leh Parliamentary Affairs changtu  Minister Pu TJ Lalnuntluanga chuan a bial chhung Champhai Venglai, Electric Veng, Zion Veng leh Tlangsam te tlawhin Sawrkar Department hotute nen mipuite kawmin an mamawh thlente bawhzui dan tur an ngaihtuah.
Law and Judicial Minister chuan mipuite harsatna hrerengin awlsam taka Sawrkar Department te dawr anih theihna turin Sawrkar Pisa hun hnaih anih thu sawiin, mipuite chu an mamawhte thlenna hun atana chhawr tangkai turin a chah a. Sawrkarah khua leh tui ten beiseina sang tak an neih thu sawiin, Mizoram chu  State naupang tak  thawhchhuak lian tak neilo kan la ni a,  mipuiten  beiseina an neihte tih  theih anih leh nih loh an hriatfiah  hmasak angai a ni, a ti a. Bial dangte entawn theih tur bial, kut tlinglo leh hlemhletna hmanga inhaivur ngailo, a thlawna sum  dawn chungchangah bial dangte zirtirtu nih kan tum tur a ni tiin, dikna leh rinawmna rilru pu chunga midange tana malsawmna nih tum turin a fuih a. Mitinte chu mahni  kutkawih hmanga dinchhuah tum tur leh  kawng engkima  Sawrkara innghah tum lo turin a chah a. Sawrkar atanga puihna  remchanglo leh nghah ngai awmah dawhthei taka awm a, mahni tanghma chauh hai lova, rilru dik leh zau zawk pu a dik tak leh rinawm taka thawk a, Zoram bung thar Moral development lama tanla turin a fuih a. A bial chhung Tlangsam a Ecotourism Park leh Cultural Centre siam tum a hmalakna mek chu a puitlin hunah Kutpui  hmanna leh khualzin hipna tha tak tur anih thu a sawi a.  Rilru puthmang  dik hmasawnna  ‘Moral development’  chu hmasawnna hmahruai anih angai a, hemi hnu chuan hmasawnna dang ten kawng dik tak a zawh thei tawh dawn ani, Law Minister chuan a ti bawk.
Pu TJ Lalnuntluanga chuan khawtlang inrawnkhawma veng leh khua tana pawimawh  ngaihtuahho hmasak thin chuan  hmalak a awlsam tir dawn thu sawiin,  “Sum kawngbo awm lo a fund te anih ang tur thlapa hman anih theihna turin rilru kalhmang siam dik hmasak a  pawimawh  a ni”, a ti a. Bial mipuite chu midang tana malsawmna nih tum tur leh sawrkar Official te nena hma la ho a hmasawnna kawng zawh tum turin a chah  a. Eirukna nuaibo turin khawtlang anga tanrual a thil diklo ti lo tur leh amah ngei pawh thil diklo ti  tura nawr lui lo turin a chah bawk a ni.
Mipui leh Sawrkar inpawhtlang taka indawrna hmang hian harsatna leh mamawh thlente tih theih anih leh nih lohte tlang taka sawiho a ni a. Hmalak dan tur te leh kawng hmangte inhrilhhriata sawiho a ni bawk. Minister Pu TJ Lalnuntluanga hi  Pi Ethel Rothangpuii, PD DRDA;  Pu K.Lalhmuakliana, DLAO/DUDO; Pu Lalduhthlana, DFO; Pu B. Lalbiakthuama, EE PWD; Pu J.Kapkima, EE PHE;  Pu Laldingliana Hrahsel, EE I≀ Pi Lucy Lalrinpuii, DFDO; Pu Lalengliana Chhangte DSP (Hqtrs); Pi Rebecca Laldinmawii Hrahsel, BDO;  Pu Lallawmkima DIPRO;  Pu Lalremmawia Colney, SDAO; Pu Vanlalvuana Rokhum, SDHO; Pu C.Lalthianghlima, SDO, I&WR  ten an tawiawm a ni.