Categories
News

GRASSROOT FOOTBALL TAN

GRASSROOT FOOTBALL TAN :
Champhai District Football Association (CDFA) buatsaih Mipa leh Hmeichhe naupang kum 6
atanga 12 inkar tana Football zirna CDFA Grassroots Football Training Course vawi 12 na chu nimin chawhnu khan Chhangphut Field-ah Dr Lallawmkima, DIPRO Champhai chuan a hawng.
Hawnna hunah thu sawiin Dr Lallawmkima chuan, thiam thil zir chak tak tak naupangte puala Football zirna hun hawn a ni leh thei chu lawmawm a tih thu sawiin, Champhai District chhunga Football hmasawnna thlentu Champhai District Football Association hnathawh chu fakawm a tih thu a sawi a infiamna chu tunlai khawvelah eizawnna tlak a nih thu leh Mizote zingah Football khelh hmanga eizawng tam tak an chhuah tawh thu sawiin, infiamna huanga tluantling chang thei tur chuan mahni inthunun, thuawihna leh taihmakna neih a ngai tel a ni, a ti a. Grassroots Football Training atanga  zirchhuak tawhten India rama Academy changtlung tak taka an awm chuan a  hlawhtlinzia a tarlang a ni, a ti a. Grassroots Football Training Course-a inziaklut naupangte chu zirna ngaipawimawh hmasa tura chahin, lehkhathiamna nen chuan thui zawk a thlen theih a ni, a ti.
He hun hi K.Lalremsiama, Grassroots Develop-
ment Officer chuan a kaihruai a. Tun session bik atan hian naupang 75 an inziaklut tawhin inziahluh zel theih a ni a. Training hi nimin  atanga tanin thla thum chhung Thawhtanni, Nilaini leh Zirtawpni apiangin Sikul ban hunah neih thin tur niin, Coach pathum ten a zirtir  thin dawn a ni. CDFA Grassroots Training Course atanga inzirchhhuak mi 10 te chuan India rama Football Academy tha ber berte an zawm tawh a ni.