Categories
News

HEALTH CARE SCHEME THAR ZIRHO

HEALTH CARE SCHEME THAR ZIRHO :
Nimin khan Champhai District chhunga Health Worker,
VC leh YMA tan Mizoram Health Care Scheme thar
chungchang inzirtirna hun hman a ni.
He hun hi I&PR Auditorium, CHANEM-ah neih niin Dr. Lalawmpuia, CMO chuan a kaihhruai a. Resource Person Dr.C.Lalthanpara, Mizoram Health Care Society Officer on Special Duty, SMO Aizawl ni bawk chuan kalkhawmte hnenah Health Care Scheme thar chungchangah zirtirna a pe a.Dr C. Lalthanpara  chuan he Scheme thar hian AB-PMJAY ang tho in chhungkaw harsa zawkte a thlawna inenkawlna an dawn theihna tur chu a tum ber a nih thu a sawi a. He scheme tharah hian chhungkaw member zat bithliah a awm lo tih sawiin, sawrkar hnathawk MR Bill thei lo te
tan pawh hamthatna a awm tih a tarlang tel bawk.
He scheme hi kumin October ni 1 atanga hman tan
tura duan niin, AB-PMJAY hmang thei lo – BPL, APL
leh sawrkar hnathawk te’n sawrkara an bill sak theih loh chhungkaw member zawng zawng an in ziaklut thei a Health Care hamthatna an hmang tangkai thei dawn à ni. Mizoram Health Care Scheme hnuaia inziaklutte hian damdawi ina an senso, chhungkaw pakhatin kum khatah Cheng Nuai 2 thleng an bill thei dawn a. Mizoram chhung bakah phai lama inenkawlna te pawh a huam tel a, enkawlna bill theih tur chu Mizoram sawrkar bithliah zat ang zel a ni dawn a ni. Kal man senso inenkawlna pawh dam lo tan chauh Scheme hnuaia hman theih zat bituk chhungah a bill theih a, kal man bill tur chuan ticket thehluh a ngai thung ang.
Mizoram Health Care Scheme a inziaklut te chuan anmahni veng VC te’n an ruahmanna hmunah inziahluh hun hawn chhungin inziakluh tur a ni a, inziahluhnaah hian Health Worker, VC leh YMA te’n mawh an phur dawn a ni. He Scheme hnuaia inziaklut tur hian September thla atanga November thla thleng hun hawn a ni a, hemi hun chhunga inziaklut lote chu a hnuah an inziaklut thei tawh dawn lo a ni.
He Scheme hnuaiah hian natna chi hrang hrang enkawlna senso bill theih a nih rualin, bill theih loh natna tenau deuhte a awm ve bawk a. Heng inenkawlna senso bill theih leh bill theih loh te chiang taka inhrilhfiah a ni a. Health Worker, VC leh YMA te hian an huam chhung mi te hnenah an hriat tur tul leh pawimawh ang ang te an hriattir ve leh dawn a ni. Mizoram Health Care Scheme hnuaiah hian inziak lut turin BPL chhungkaw tan Cheng 100 chawi a ngai a, APL chhungkaw tan Cheng 1000 chawi angai dawn thung a ni.