Categories
News

KHAWVEL THIAMNA IN A THLAK THEIH LOH CHU CHUAP

KHAWVEL THIAMNA IN A THLAK THEIH LOH CHU CHUAP :
Nimin khan Champhai District Tobacco Control Cell te chuan Champhai Nursing School Building-ah Mizoram State Anti-Tobacco Day an hmang.
He hun hi Zosangzela, District consultant-in kaihruaiin District Tobacco Control Cell (DTCC) hmalak dan tlangpui a tarlang a, he hun hmanpuitu Dr. R Lianmawia, District Nodal Officer DTCC chuan Mizoram State Anti-Tobacco Day thupui Tobacco and Lung Heath sawiin, chuap pawimawh zia leh Vaihlo khuin a ur chhiat theih dan te a sawi a.
Khawvel thiamna hmangin taksa bung hrang thenkhatte chu thlak theih ni mah se Chuap erawh thil thlak theih a nih loh thu sawiin, Chuap hi boruak kan hip luhna ber a ni a, boruak tel lovin mihring kan nun theih loh avangin Chuap hi kan nunna tura thil  pawimawh tak a ni, a ti a.
Chuap cancer za zela 80 te hi zuk leh hmuam ti mi an nih thu sawiin, kan duatin chuap tana thil tha lo lakah kan insum a ngai a ni, a ti bawk. Anti Tobacco Squad-te hmalakna pawh tarlangin, ATS te hmalakna avangin zuk leh hmuam tih phal lohna hmunah ti an tlem phah a, changkanna-in zuk leh hmuam a tihtlem thu a sawi bawk.
He hun hi CMO Staff Champhai leh Eastern  Flower Academy School ten an tel pui a, Lalrawngbawla Social Worker, DTCC chuan  lawmthu sawiin he hun hi a khar a ni.