Categories
News

KUM 10 CHHUNG TANG TURIN REL

KUM 10 CHHUNG TANG TURIN REL :
Nimin khan Champhai Special Judge, R. Vanlalena, MJS chuan heroin kawltu Salemthara, Vengthar Champhai chu kum 10 chhung hrehawm taka Jail tang tur leh pawisa Rs. 1,00,000/- chawi turin a hrem. Pawisa chawi tur hi a pe theilo a nih chuan thla 2 dang tang turin ati bawk.
Salemthara (19)ns/o Tuantuahkimi, Vengthar Champhai chu Ni 23.6.2018 khan Champhai Excise te chuan zing dar 9:30 velah Champhai Helipad hnuai zawnah Heroin hawng 22, gram 307 a rit chu man sak in amah Salemthara pawh hian man nghal a; a lakah hian ND&PS Act tlawhchhanin thubuai an siamsak a. District Court Champhai-ah amah leh a kut atanga heroin an man chu thawnin a thubuai hi Special Judge chuan nikum September thla atang khan rel tanin, thuhrethu hrang hrangte court-ah koh an ni a. Salemthara  hian he No. 4 hi ama duhthu renga a rawn ken pawh ni lo, a u te zinga mi pakhatin Zokhawthar atanga la turin a ti a. Chu chu va la in a rawn hawpuina kawngah Excise te hian report dawngin amah hi an lo man ta a ni tih a sawi a Ruihhlo an man hi Forensic Science lam pawhin Heroin a ni ngei a ni tih an prove thlap a ni. Salemthara hi a u in hetiang thil hi Zokhawthar atanga a va laksak thei a nih chuan a School kalna tur atan motor pakhat leisak a tiam avanga va la ta niin a sawi bawk. Heroin hi tualchhung rate a Rs. 8,00,000/- man vel a ni. Court chuan thilsual titu chungchang a relnaah hian thilsual titu hian a duh ve vang renga tisual ni chiah lovin, midang thlemna avanga hetiang thil pawi hi khawih ta ni a hriatsakin, hremna hi a na thei ang ber pe lovin ngaihhnathiam takin thubuai hi a ngaituah a.
Hremna atan kum 10 chhung hrehawm taka  Jail tang tur leh Rs. 1,00,000/-chawi turin a ti ta a ni. Rs. 1,00,000/- achawi theilo anih chuan thla 2 dang tang turin a ti bawk.