Categories
News

RAM TANA NUNA HLANTUTE HI ZAH AN PHU

RAM TANA NUNA HLANTUTE HI ZAH AN PHU :
Health & Family Welfare Board vice chairman Dr. ZR Thiamsanga chuan, Martar-te Ni ah hian,  ram leh hnam chimrala kan awm loh na’n hnam rilru pu thar zel ila, lungrual takin thawk ila, ram  leh hnam tan tangrualin hma i la zel ang u, a ti.
Nimin khan Mizoram hmun dang rualin Champhaiah pawh MNF Champhai
North Block-I chuan Vengsang YMA Hall-ah Martar Day Vawi 40-na pualin hun an hmang a, he hun hmanpuitu Champhai North Bialtu MLA Dr. ZR Thiamsanga chuan he thu hi a sawi a. Ram changkang apiangin mahni ram tana nunna hlantute ngaihsanna  chang an hria tih sawiin, Ram leh Hnam tana nunna hlantute hian zah an phu ang ngeiin kan zah tur a ni. Sawrkar pawh hian nunna hlantute leh riltam
leh hrehawm pawh pawisa lova  lo pen chhuak tawhte hi a ngaihsak a tul a ni, a ti a. Ram leh hnam tana ke penchhuak hnam pasalthate thisen avangin Mizoramin rahbi thar kaiin hmasawnna tam tak a nei a ni, a ti. Ram tana an nunna hlantu Hnam pasalthate sulhnu chhunzawm tura thangtharte inbuatsaih a tul thu a sawi a. Ram tana Martar-te hmachhawp chhunzawm hi thangtharten kan tih tur a ni, a ti. Dr. ZR Thiamsanga chuan India Sawrkarin Mizoram a ngaihsak ngai loh avanga loh theih loh avangin zalenna a sual thu sawiin, India rama District pakhat chauh kan ni thin a, Mizoramah tam nasa taka a tla chung pawhin India sawrkar ngaihsak a hlawh ngai loh avangin hnam thinlung pute’n anmahni duh thu reng vang ni lovin loh theih lohna avang zawkin zalenna an súal ta a ni, a ti. Hnam rilru Mizote’n kan put thar leh a tul thu sawiin, Mizo hnam hi chimrala kan awm lohna turin hnam rilru kan put thar a ngai a, ram leh hnam chhan nan lu chhum, ban chhum pawh huama ke kan pen a ngai a ni. Martar-te ni kan hman atang hian beiseina thar nen hmalam i pan theuh ang u, a ti a. A bik takin, Martar chhungte chu, ram tana Martar-te zah leh ngaihlutu political party awmchhunah awm theuh turin a sawm bawk.  Martar-te ni puala hun hman hi PC Zohlira, MNF Champhai North Block I, President chuan kaihruaiin Martar-te sunna hun hman a ni a, Martar chhungte hnen atangin thusawi ngaihthlak a ni bawk.
He hunah hian MLA inthlan zawh taka Champhai North A/C huam chhunga MNF in Vote an hmuhsanna veng/khaw pathum, yote an hmuh san dan indawtin – Kahrawt, North Khawbung leh Champhai Vengsang hnenah, MLA hian a lo tiam tawh angin lawmman pek theuh an ni bawk.
Champhai-ah chuan Martar Day hi MNF
Champhai South Block leh North Block I te chuan a hrana hmangin, Champhai South Block-te chuan nimin zing khan hun hmangin, Martar-te hriatrengna lungphun, CHANEM Building tualah martar-te zahna hlanin pangpar an dah a. MNF Champhai North Block I chuan chawhma dar 10:30 khan Martar-te hriatrengna lungphunah hian Martar-te zahna hlanin, Champhai North  BialtuMLA Dr. ZR Thiamsanga leh MNF Champhai North Block-I hruaitute leh Martar chhungte’n pangpar an dah a ni.