Categories
News

TLEIRAWL TE HRISELNA ENFIAH

TLEIRAWL TE HRISELNA ENFIAH :
Nimin khan Champhai DC Dr. Naveen Aggarwal chuan MJA Champhai District member-te lengah sawmin tunhnai maia POSHAN Abhiyaan kalpui tha lawmman 2018-19 Champhai District-in a lak tak leh High School kal Zirlaite hriselna zirchianna Haemoglobin Test kalpui dante leh hmalakna tulte DC Conference Hall-ah a sawipui. 
Dr Naveen Aggarwal chuan POSHAN Abhiyaan chungchang sawizauin, POSHAN Abhiyaan chu  Nu naupai, Nutling leh naupangten an mamawh ang eitur tha an dawn theihna tura hmalakna niin,  eitur tha   ei chuan mi a ti hrisel a, nau hrisel  tak hrin kawngah hma thui tak a su a ni, a ti a. School-ah Mid Day Meal-te sem anih bakah Anganwadi-ah Naupang leh Nu tana chawtha leh damdawi Iron, Vitamin leh  thil dangte pekchhuah thin a nih thu leh POSHAN Abhiyaan hnuaiah   chaw tha  leh damdawi pekchhuahte felfai taka digital hmanga ziahluh thlap zel a ni, a ti a. Champhai District-in POSHAN Abhiyaan hnuaia Mizorama District titha ber ani chu chhuanawm a tih thu leh hemi kawnga thathawhtu  Anganwadi Worker, ASHA, Social Welfare Department, Health and Family Welfare Department thawktute leh khawtlang mipui tawiawmtute chungah thinlung takin lawm thu a sawi bawk. 
Bawrhsap chuan Champhai District hrisel siamna tura hmalakna pakhat atan High School Zirlai abikin  tleirawlte Haemoglobin level test anih thusawiin, Mihring pangaiah Hb level chu 11-14 anih thin thu leh Sikul thenkhat thlan bika Hb test atanga a lan danin a tam ber chuan 10 an pelh thu leh  10 aia   hniam tlem hmuhchhuah anih thu a tarlang a.  CMO, MHIP leh YMA te nena tangkawpin  tleirawl tam thei ang berte Hb level test sak  tum anih thu sawiin, Hb hniam an awm chuan a tul anga chawtha leh puihnate pek tum a ni tiin, hmeichhiate lo hrisel zawkna tur leh naupiang hrisel siam kawngah theihtawp chhuah tum a ni, a ti bawk. 
MJA Champhai District chuan Champhai District-in POSHAN Abhiyaan hmalakna hmanga District titha ber ani thei chu an chhuan thu sawiin, tha thawhtute zawng zawngte fakawm an ti a. Hriselna lam kawnga thuneitute hmalakna angte chu fakin, a theihna apianga tawiawm zel an tum thu an sawi bawk.

District Bawrhsap hi Pu Zoremthara Ralte, SDO (Sadar) leh Dr Lallawmkima, DIPRO ten an tawiawm a ni.