Categories
News

CHENNA IN THAR SAK SAK

CHENNA IN THAR SAK SAK :
Pu Kapthanga, kum 75, Mualkawi Chhinga Veng chenna in chu nimin khan Mualkawi khawtlangin an sak that sak.
Pu Kapthanga hi kum 2016 Krismas hma deuh khan Maxi Cab in su palhin,chuta tang chuan che thei lovin vawiin thlengin a awm a, zun leh ek pawh an khumah thiar sak thin a ni. A fapa Lalthlangmawia nen cheng dun an ni a, a fapa hi kum 50 bawr vel ni tawhin a chetsualnaah a khel a tha lova, hna rum thawk thei dinhmunah a ding tawh lo va, a chetsual hma chuan
Herhsawp siamin an ei tur a thawkchhuak thin a ni.
Mualkawi Branch YMA hmalakna in Pu Kapthanga in sak that hna hi kalpui niin, Mualkawi khawtlang chuan in sak thatna atan hian chhung tin in pawisa an thawhkhawm a. Nilaini khan Pu Kapthanga chhungte chuan a in thiah hna thawkin nimin zing atang khan Mualkawi khawtlang chuan hnatlangin In sak that hna hi an tan a. In hi a dung Ft. 18 leh a vang ft. 16 a sak niin, Assam type a sak a ni a, a bang hi rangva leh tile hmanga bel tum niin, a chung rangva leh a chhuat thingphel hman tura ruahman ani. Nimin khan hnatlangin mi 140 bawr vel an thawk a, hnatlanga chhuak te hian thing chak remchang ang angte an kengkhawm a ni.
Pu Kapthanga in hmasa hi a chung rangva leh a bang dap a siam niin, a chhuat ah thingphek leh rua te hman a ni a, kum 21 bawr vel a fapa nen he in ah hian an lo cheng tawh a. A in hmasa hi luah ngam tawh loh khawpa awngrawp a nih tawh avangin Mualkawi Branch YMA te chuan a in hi sak thatsak turin hma an la ta a.
Nimin khan sak zawh hman tum anih laiin tlai lamah ruah a tam deuh avangin an zo fel hman lo va, vawiin hian zawhfel hman an beisei a ni. In sakna atan hian khawtlangin sum an thawhkhawm bakah mimal tlawmngaiten an bungrua neih ang ang an thawhchhuahpui a, hei bakah hian LB Hardware Store, Vanbawiha In Opposite a mi te chuan perek an tum sak bakah Lalhmunsanga (Tesena) Zotlang a thingzai thin chuan thing zai tur awm ang angte a thlawnin a lo zai sak. a. KhuanglengnVCP in Cheng 500-in an pui bawk a. In sakna atan
hian Cheng Sing 5 bawr vel seng tura ngaih a ni.