Categories
News

FUAN TLENG RUAH SUR HAR

FUAN TLENG RUAH SUR HAR :
Sangha fuan tawp lama ruah sur thin, sangha fuan tleng fai tura ruah sur nia pi leh pu te’n an lo sawi “fuan tleng” chu kumina a tlak har deuh avangin Inrinni thleng khan ngha fuan hnukhawi hmuh tur a la awm niin Khawbung Branch YMA hruaitute chuan an sawi.
Khawbung Branch YMA-te chuan an khaw tlawh chhan lui 2 -lui dang lo ang takin chhun lamah nghalim fuanna thin Vawmkhum lui leh Tlawva lui-ah te Inrinni thleng khan nghalim fuan hnukhawi hmuh tur a la awm niin an sawi a. Zing khaw en atanga tlai thim hma thlengin Vawmkhum leh Tlawva lui pawhtu kawrte thenkhatah nghalim a fuan thin a ni. Heng nghalim fuante hi a fuanna tur kawrte hai rem sakin, sangha fuan tur luidunga an inhawrkhawm leh fuan sum-a an kai a, an fuan zawha lui lama an kir leh thlengin YMA duty te chuan an veng reng thin niin an sawi. Sangha fuan sa hi a tui lovin a fei em em a, sangha fuan man tum lo turin an inzirtir bawk a ni. Nghalim a fuan hian a pa nen an indelh tui a, a tui chhuak chu a pa chi chhuakin a char nghal zel a. Sangha fuan zawha ruah sur “fuan tleng” hian tui chim loha sangha tui awmte chu luiah emaw kawrte tuiah emaw tleuh lutin, khuarel fel tak hnuaiah “fuan tleng” ruah sur hi sangha tui chhe tur vengtu pawimawh tak niin thil chik mite chuan an sawi. Hetianga “fuan tleng” a sur mai loh hian sangha fuan hi vil a ngai zual niin an sawi bawk.