Categories
News

PRESS CLUB AH MINISTER

PRESS CLUB AH MINISTER :
Minister-te hi Lal kan ni lo a, mipui chhiahhlawh kan nih avangin hauh ngam kan ni a. Journalist-te chu Sawrkar thurawn petu leh sawisel ngam an nih a ngai a, sawrkar tha nei tur chuan sawrkar pawh chutiang dawngsawng thei chu a nih a ngai, a ti
He thu hi MJA Press Club, Bethel Veng Champhai nimina tlawhtu I&PR Department changtu Minister Lalruatkima chuan a sawi a. Minister hi MJA President C.Lalhnunpuia leh thawhpuiten lo  dawng sawngin inkawmhona hun an hmang a ni. Minister chuan Chanchinbumite chu mipui rawngbawltu an nih angin sawrkar hmalakna leh pawimawh dangte zirtirna kawngah sulsutu an ni, a ti a.
Intuaihriam zel tur an nih ‘hria-in an tan Workshop, Seminar leh Press tour te buatsaih thin a ni a, a tul ang zelin hmalak chhunzawm tum ani, a ti bawk. IPR Minister chuan Journalist Pension Scheme a taka kalpui a nih theihna turin proposal siam a nih thu te, Health Care Scheme leh Welfare Scheme mumal tak neia kalpui tuma hmalak a nih thu pawh a sawi bawk. Press Club Landlease siam leh a panna kawng, tualzawl chei hna pawh department lam hotute nen a theih anga hmalak zel tum a nih thu a sawi bawk.
I&PR leh Revenue Department changtu Minister Lalruatkima chuan Champhai leh Kolasib-a FM Radio Station bun a nih theihnan I&B Ministry dawr a nih
thu leh SEDP hnuaiah rám nei lote’n eizawnna ngelnghet an neih theih nan ram ngaihtuahsak tuma hmachhawp
neih a nih thu pawh a sawi a. MJA Champhai District aiawha thusawitu President C.Lalhnunpuia chuan hun chep tak kara Minister-in ngaipawimawha a tlawh vangin lawmthu a sawi a.Chanchinbu kaltlanga advertisement mumal zawka dawn anih theihna tura hmalak sak tura hgenin, Sawrkarin Journalist Pension scheme kalpuitura hma a lak avangin MJA member zawng zawngte aiawhin lawmthu a hrilh nghal a ni. Minister hi Lalremsanga, Jt Director, Revenue Dept; Ethel Rothangpuii, PD DRDA Champhai leh Dr Lallawmkima, DIPRO Champhai ten an tawiawm a ni.
Minister Lalruatkima hian a chan department Revenue leh BDO Champhai office-te tlawhin thawktute nen inkawmna hun an hmang a. Mipui rawngbawltu an nihangin rinawm, taima leh dawhthei taka thawk turin a fuih a. Mamawhan thlente pawh a tul ang zela bawhzui a nih tur thu a sawi a ni.
Heng Pisa a tlawhnaah hian Minister hi Alexander V.Chongthu, DC Champhai; Lalremsanga, Jt Director Reveue Dept; Ethel Rothangpuii, PD DRDA Champhai; Zoremthara Ralte, SDO Sadar; Lalnunfela Chawngthu,SO leh official dang ten an tawiawm a ni.