Categories
News

RAM THEH PHALLO

RAM THEH PHALLO :
Nimin khan Zotlang khawtlang chuan an ram humhalh chhungah Ruantlang VC in ram theh an tum nia sawiin hemi duh lo hian an pungkhawm.
Zotlang khawtlang hruaitute hnen atanga kan Palai in thu a dawn danin Ruantlang VC ten ram theh an tum Hmawng Mual ram chu Ruantlang VC atanga Zotlang VC a indan tirh atangin Ruantlang VC in Zotlang ram atana a indansak ram niin Zotlang khawtlang hruaitute chuan an sawi a, he lai ram hi Ruantlang leh Zotlang khawtlang hruaitute thukhawmin khaw pahnihte remtih tlanna tel lo chuan theh theih a ni lovang tia inremna thu an lo thlun tawh bawhchhiaa Ruantlang khawtlangin Zotlang khawtlang rawn miah lova ram an theh ta mai chu an hriatthiam loh thu leh engti kawng zawng pawha a tawp thlenga ram theh a nih lohna tura hma an lak tur thu an sawi a. Thangkhat lian dawn kangmei lakah an lo humhim tawh leh Zotlang leh Ruantlang khuate’n a tui lak hnar a nih avanga rim taka an humhalh lai a nih thu te, boruak lum zel tur venna atana an ram ngaw humhalh lai hi engtikawngmaha thiah an rem tih loh thu an sawi bawk.
Zotlang VCP Pu Lalbiaktluanga chuan ‘ He lai ram hi kangmei lakah pawh Ruantlang khawtlangin vuak khat pawh an vuakpui ngai loh thu sawiin lu chhum ban chhum huama Zotlang khawtlangin an lo humhalh a nih avangin an thikthu a chhiat thu a sawi a. Hmawng mual ram chu theh loh tawp an duh thu leh Environment leh tuihna humhalh thlenga khaw pahnihte tana tangkai tak a nih avangin lo atana theh a rem loh thu a sawi bawk.
Hetih lai hian Ruantlang VCP in kan palai a hrilh danin Ruantlang VC-ten an ram chhungah ngei ram theh an tum thu leh Ruantlang VC in ram an theh tum hi Ruantlang VC in Zotlang VC a indanna lai ram a nih loh thu a sawi thung.
Champhai District Magistrate aiawh Pu Benjamin Zalawma Ralte, DLAO Pu K Lalhmuakliana leh SDPO Pu Lalsawta chu kalin khawtlang pahnih hruaitute be rawnin remna palai hna an thawk nghal a, Nimin khan Ruantlang khawtlang pawh ram theh tur hian an kal lo va, District thuneitute hian chinfel thuai tur a nih thu sawiin an ngenna angin buaina lian tham thleng lovin Zotlang khawtlang mipuite pawh an tin thei a ni.