Categories
News

RAMRI A SUMDAWNG LEH HNATHAWK TE INKOKHAWM

RAMRI A SUMDAWNG LEH HNATHAWK TE INKOKHAWM :
Nimin khan Indo-Myanmar Border Trade, Zokhawthar Exit Point hnuaia sumdawnna khawihtute leh, hemi zarzo va hnathawktu Pawl hrang hrang aiawhte Zokhawthar YMA. Hall-ah Meeting an nei.
He hunah hian resolution an siam a. Indo-Myanmar Border Trade, Zokhawthar Exit Point atanga sumdawnna kal tluang pangngai, Border Security Agency ten, Sorkar leh mipui te taña hlawkna leh hmasawnna engmah awm phah chuang si lo va an tihbahlah mek hi mipuiten a zar kan zo va, eizawnna atana kan hman leh
theihna turin tun hmaa kalpui dan pangngai anga a kal leh kan phut a ni, tih te; Border Trade Security duty ten Border Trade enkawltu leh Competent Authority ni bawk, Central Customs & Excise duty-te ring lo ang maia sumdawnna thila rambuai lai ang mai a, silai nena mipui rikrap zawnga
Zokhawthar Trade Centre-ah leh National Highway-a an khawsa thin hi titawp nghal turin thuneitute kan phut a ni, an ti a. Dan tlawhchhan mumal nei lo leh an thuneihna nen pawha inkaihhnawih lo, sumdawng bungrua Assam Rifles ten an hrensak mek leh a phurtu Lirthei zawng zawngte hi thu
delhkilh engmah awm lo leh pawisa chawi lo va pe thuai turin Sorkar thuneitu an ngen let tih an sawi a. Assam Rifles ten rambuai ang maia an duhna hmun hmuna lirthe check leh rikrap an ching thin chu an duh lovin, zalen taka kalphung pangngai anga intlawhpawh leh theihna tura
ruahmanna siamsak turin Sorkar thuneitute an ngen a. Zokhawthar kaltlanga sumdawnna a lo hlawhtlin a, hma a lo sawn zel theihna turin, hemi kawnga sumdawng ten Sorkara chhiah an pek thin sang lutuk chu, tun hmaa kalpui dan angin, 4% a chhiah laksak turin Sorkar thuneitute a ngen tih an tarlang.
Heng an ngenna te hi tihpuitlinsak an nih loh chuan a tul anga hmalakzui leh, District Headquarters hmuna Kawngzawh leh demonstration neihte an ruahman tel bawk.