Categories
News

RTI WEEK HAWNG

RTI WEEK HAWNG :
India khua leh tuiten an dikna leh chanvo an hmuh theihna tura puitu, sorkar langtlang siamtu, eirukna do leh veng tura siam Right to Information Act haptakhat chhung hman tur chu nimin khan I&PR Auditorium CHANEM Building-ah hawn a ni a, he hun hi Champhai Bawrhsap Dr Naveen Aggarwal, IAS chuan khuallian niin a hmanpui a ni.
RTI Week hi India ram pumah kumtin October Ni 5-12 chhunga hman thin a ni. Khuallian chuan Right to Information Act chu India khua leh tui tawh phawt ten Sawrkarah hriat duh an neihte an zawh theihna tur a duan dan a nih mai bakah zawhna dawngtu Department-te pawhin hunbi tuk chhung ngeia chhanna an pek theihna tura dan siam a ni, a ti a. RTI diltutendilna man bituk chawi ve a ngaih thusawiin, Below Poverty Line chhungkaw tan erawh engmah chawi a ngai lo ani, a ti a, RTI dan hmangin langtlang sawrkar siam leh eirukna leh hlemhletna a ven theih thu a sawi bawk.
Dr Naveen Aggarwal chuan he dan hian Sawrkar department-tehna thawh leh nihphung hrang hrang mipuite hriat ve atana tangkaite puanzar kawngah leh vawnthat chu a thlurbing a ni, a ti a. Department Official-te chu an hnathawh leh kalphungte zau zawk a mipuite hriat a puangzar thin tur leh RTI hmanga zawhna dil an awm changa inhawng taka lo dawng sawng a, an mamawhte lo pe chhuak thin turin a chah nghal a ni.  
Pu Zoremthara Ralte SDO Sadar chuan Champhai District chhungah 2018-2019 chhungin RTI zawhna 25 dawn a nih thu tarlangin, sawrkar hnathawkte mipuite hmakhua ngai chunga hnathawk turin a chah a ni.  RTI hapta hawnna neih zawh hian District Information & Public Relations Officer Dr. Lallawmkima kaihhruainain RTI Workshop neih chhunzawm nghal a ni a.  He hunah hian Resource Person tura ruat Pu K. Hrangdawla, District Resource Person hnen atangin RTIchungchang leh chhawr tangkai a nih theih dan turte ngaihthlak a ni a. State dang anga RTI kan la buaipui nasat loh thu leh a nihna ang taka kan la hman tangkai zawh loh thu a sawi bawk.