Categories
News

HOSPITAL VENG BIAK IN HAWNG

HOSPITAL VENG BIAK IN HAWNG :
Inrinni khan Cheng 81,02,000 senga sak Champhai Hospital Veng Presbyterian Kohhran Biak In thar chu Synod Moderator Rev. R. Lalhmingthanga’n a hawng.
Hawnna inkhawm neih hma hian Upa Dr. J.Lalramchhuanga kaihhruaiin
kum 25 an tlin, Silver Jubilee dar vuak a ni a, Synod Moderator in hma hruaiin
Champhai South Presbytery Moderator leh Kohhran hruaituten an zui a, KTP leh Kohhran hmeichhia bakah Kohhran Pavalai Pawl hruaituten Jubilee dar hi an vua a ni. Kum 25 an tlin lawmna hi ni 6 atang khan an lo hmang tawh a. Biak In thar
hawnna chhunzawm niin Rev. R.
Lalhmingthanga, Synod Moderator chuan Biak In thar chu Pathian hruaina leh Kohhran ho te thawh hona leh thahnem ngaihna vanga ding thei a nih chu sawiin, Biak In thar chu Thlarau Thianghlim zalenna a nih theihna tura malsawmin a hawng a ni. Hawnna Inkhawm, Biak In chhungah hman zui niin, Rev. PC Malsawmtluanga, Moderator, Champhai South Presbytery chuan kaihhruaiin Upa Dr. J. Lalramchhuanga’n Biak In sak a nih dan a tarlang a. Synod Moderator
Rev. R. Lalhmingthanga hnen atangin Pathian thuchah ngaihthlak chhunzawm ani a, tlai lamah Biak in thar leh Jubilee ruai Kohhran hote’n an kilho nghal a ni. Inrinni zan khan Pathian Biak Inkhawm neih chhunzawm ani a, nizan thleng khan hun hman chhunzawm a ni.
Champhai Hospital Veng Presbyterian Kohhran hi Kum 1994 ah Vengsang
atangin an indang a, Kum 1995 ah Presbytery Inkhawmpui in a phalsak
angin Kohhran Puitlingah hlankai a ni a. Kum 1996, June ni 29 ah Rev.
Vanlalfaka, Moderator, Khawchhak Presbytery chuan a hawng a, hetih laia
Biak In hi Assam Type-a sak niin kum 22 bawr vel an luah hnuah Kohhran mipui pun zel dan thlirin Kohhran Committee chuan Biak In thar sak chu rel lehin Inrinni-a an hawn tak hi sak a ni ta a ni
Biak In thar hi Kum 2012 June thla khan a sak hna tan a ni a, Biak In sakna atan Synod chuan Cheng Nuai 12 a pe a, Loan Cheng Nuai 68 an puk bawk a. Heng bakah hian Kohhran hrang hrang leh mimal atanga tanpuina an dawn atangin Biak In sak hna hi an thawk a, a vaiin Cheng Nuai 81 leh Sang 2 an seng a ni.
Tun dinhmunah he kohhranah hian Dan zawhkim 288 an awm mek a, naupang kum 14 hnuailam baptisma chang tawh leh la chang lo 126 an awm a, thunnunna tawk mek 6 awm bawkin an vaiin 420 an awm mek a; mipa 203 leh hmeichhia 217 te an ni
Kumin chhungin nau. piang 3 an awm a, mitthi. 3 an awm bawk. Kohhran Upa 6 awm mekin Pem tawh 2 an awm
bawk a, Hospital Veng. Kohhran a din atangin Pastor 7 leh Pro Pastor 2 an awm tawh a ni.