Categories
News

HUMSUAL DAITE KAWNG DIK ZAWH NAN JAIL SIAM A NI

HUMSUAL DAITE KAWNG DIK ZAWH NAN JAIL SIAM A NI :
Champhai Additional District and Session Judge R.Vanlalena chuan hmangaihna avang zawkin, India danpui hnuaiah humsual dai palhten kawngdik an zawn leh theihna tura Jail tang mekte chu insiamtharna hmuna dah lailawk rih an ni, a ti.
District Legal Services Authority bultumin Inrinni khan Champhai District Jail-ah National Legal Day hman a ni a, he ni denchhen hian Champhai District Jail-a tang mekte hnenah dan hnuaia mitin chanvo inhrilhfiahna hun hman a ni. District Legal Services Authority Secretary & CJM Lalrochami Ralte kaihhruaiah hian Additional District & Session Judge R.Vanlalena chuan, Lung in hi misualte tawmkhawmna atana sorkarin a din ni lovin, bumtu bumna avanga tlupalh, tihpalh vanga humsual daite awmkhawmna a ni, a ti a. Chungtiang mite in dinthar lehna tur leh an kalpenna lak ata nunkawng dik an zawh theihna tura India danpurin a phut vanga Dan kengkawhtuten dan hmanga an dahkhawm rih an nih
thu a sawi a. Humsual dai palhte insiamthatna turin India dan-in insiam thatna tur lamhawi zawkin hma a lak thu leh, lung in tantirte chu mimal inhuat vang a nih loh thu a sawi a. He hmun atang hian rilru leh thlarau lama piantharna chang turin duhšakna a hlan a. India khua leh tui humsual daite tan insiam thatna hmun awm lo se, sualna khur thuk zawkah lutin, nun tawina a thlen ngei dawn a ni, a ti bawk.
He hunah hian Senior Civil Judge Lalramsanga chuan Jail tangte pualin an dikna leh chanvo hrilhfiahna hun a hmang a. District Jail-a tangten an
mamawh an thlenna tur District Legal Aid Cell chungchang a tarlang bawk a. MJA Champhai District aiawhin C.Lalhnunpuia chuan thu a sawi bakah
Jail tangte pualin Quiz Competition neih a ni bawk.
National Legal Services Day pual hian Champhai District Jail-a tang mek mi 167 te tan Water Filter 6 pek a ni a. Jail tangte hriselna enfiah tura Medical Team awm a tul thu leh District Board of Visitors ruangam din that thuai a, a khat tawka jail tangte dinhmun hre tura tlawh chu tih makmawh a nih thu he hun hmannaah hian tarlan a ni bawk.