Categories
News

KUM 12 JAIL TANG TURIN CHUNGTHU REL

KUM 12 JAIL TANG TURIN CHUNGTHU REL :
Nimin khan Champhai Special Judge R. Vanlalena chuan Ganja Kg. 51 leh gram 6 neitu Ralkhuma Chhangte chu hrehawm taka kum 12 Jail tang tur leh Cheng Nuaikhat chawi turin hremna a tichhuak.
Kum 2018 kumtir khan Champhai Police leh Assam Rifles tangkawpte chuan Zote Lei bulah Sumo pakhat Hnahlan lam atanga Champhai pan chu report an dawn bawhzuiin an lo chang a. He Sumo hi an han enfiah chuan Sumo chunga Holdall chhungah leh Bag dang pakhat chhungah chuan Ganja tam tham tak an hai chhuak a. He ganja hi tunge a neitu tia an han zawh chuan passenger zinga pakhat Ralkhuma Chhangte, a pa Thuamkunga, Hnahlan khua chuan a ta a nih thu a sawi.
Ralkhuma Chhangte hi police te chuan manin a lakah hian ND&PS Act tlawhchhanin thubuai an ziak lut a. He
thubuai hi Champhai Special Judge in trial a kalpui chhungin prosecution thuhretu pali an exam a, Ralkhuma thiamthu sawi sak turin mi 7 court ah an inlan bawk. Thuhretute thusawi zawng zawng ziaka record te chu ngun tak leh chik taka court-in a buk tawn hnuah thutawp siamin Ralkhuma Chhangte chu hrehawm tak kum 12 jail tang tur leh Rs. Nuai 1 chawi turin a hrem ta a ni.