Categories
News

STATE GAMES TURIN INBUATSAIH ZEL

STATE GAMES TURIN INBUATSAIH ZEL :
December Ni 9-13, 2019 chhunga Mizoram State Games-2019 neih tura
Champhai South Assembly Constituency tana hmala tura din, Champhai South Assembly Constituency Level Committee chu nimin chawhnu khan an Chairman TJ Lalnuntluanga, Law and Judicial Minister leh bialtu MLA ni bawk hovin
Circuit House Conference Hall-ah an thukhawm.
Minister TJ Lalnuntluanga chuan, Mizoram State Games 2019 chu infiamna chawisana hma kan sawn theihna tura chhawpchhuah, Assembly Constituency hrang hrangte inelna tura ruahman a nih thu sawiin, theihna leh thiamná nei thalaite zawnchhuah a, tihhmasawnna tur a ni, a ti a. Infiamna pui tham tak MLA bial hrang hrangte telna tur a nih angin bial leh District hmakhua ngaia theihtawp. chhuaha ngaihtuahna sen a ngai tih a sawi a. Infiammi leh mawhphurhna kengkawhtu zawng zawngte chu rilru zau tak pu a, mahni chanvo theuhte tihlawhtling thei tura ngaihtuahna seng tura chahin, mahni khua leh Constituency aiawh tur an nih angin bial tihmingtha tura phut let nei miahloa theihtawp chhuah turin a chah a ni.
He hunah hian Jacob Lalnunhlima hnen atangin Secretary report ngaihthlak a nih hnuah, Sports discipline hrang hranga mawhphurhna neitute hnen atangin hmalakna leh hmachhawpte ngaihthlak niin, medal la ngei thei tura beiseiawmte chauh intirh ni se tih a ni a. Sum mamawh zah tur leh sum tuak dan tura hmalaknate Fund Raising Committee leh Fin. Secretary hnen atanga ngaihthlak a nih hnuah sum tuak leh hman dan turte uluk zawka zirchian leh ni se tih a ni. State Games nghahna hmun Aizawla thlenna tur leh mamawh tur awm thei dangte pawh he hunah hian sawiho niin, Champhai South Assembly Constituency Flag leh Jersey neih ni se tih a ni a, a rawng atan Rawng Pawl (Sky Blue) chu lungrual taka thlan a ni bawk.
Meeting-ah hian Rex Zarzoliana Vanchhawng, SP Champhai, Advisor;
Zoremthara Ralte, SDO Sadar, Working Chairman, SDO Sadar; Dr.Lallawmkima, DIPRO bakah, Mizoram State Games 2019 inpuahchahna atana Champhai South bial chhunga mawhphurhna neitu hrang hrangte an tel a ni.