Categories
News

TLEIRAWL HARSATNA NEITE TANPUI TURIN RKSK AWM TA

TLEIRAWL HARSATNA NEITE TANPUI TURIN RKSK AWM TA :
Rashtriya Kishor Swasthya Karyakam (RKSK) buatsaihin nimin khah Adolescent Health Day 2019 hman a ni.
He hun hi I&PR Auditoroum, CHANEM-ah neih niin Dr. R. Lalawmpuia, CMO chuan Adolescent Clinic Hospital ah hawn a nih thu leh kar khatah vawi 2 Counsellor an thu thin tih a sawi a. A thlawnin kar khat chhunga heng ni 2 chhung hian tleirawl,  taksa inthlak danglam avanga harsatna nei te tan pan theih reng an ni tih a tarlang a. Tleirawl an nih lai atanga an hriselna tur an ngaihtuah that chuan an puitlin hun thlengin an hriselna a that phah thei a ni, a ti. RKSK hian ei leh in bakah mipat/hmeichhiatna chungchanga inzirtirna te, tharum thawhna tihtawpna tura inzirtir leh ruihhlo hman sual laka inven dan te chu an tum lian tak a nih thu leh he an tum hian thingtlang kilkhawr ber a huam tih a sawi.
Dr. R. Lianmawia, DMO chuan Adolescent Health Day an hman chhan chu, tleirawlte
hriselna chawi kan a nih theihna tura hmalak a nih thu a sawi a. Kum 10 atanga kum 19 inkar hi kan taksa mai bakah kan rilru ngaihtuahna thlenga a inthlak chhoh hun lai a ni a, mihring te hun tawnah chuan a pawimawh lai her a ni, a ti a. India mihring za zela 21 chu tleirawl an ni a, an hriselna ngaih pawimawh a tul thu te a sawi tel bawk.
Dr. R. Lianmawia chuan kan rama tleirawl za zela 55 chu thisen tlachham an ni a, tleirawlten thisen an neih tam loh chhan an zirchiannaah chuan, kan hriselna tichhe theitu keimahnia a awm vang leh kan ei leh in tha tawk lo avangin thisen kan ngah tawk lo thin a ni, a ti a. Thisen kan neih that loh chuan nun a harhfim thei lo va, lehkha thiam thei tak nih a har, a ti. Thisen ngah tawk lova chi thlah a, nau an hring a nih chuan naute chu a hrisel lo nghal thin a, an hriselna chu tun atanga ngaih pawimawh a ngai a ni, a ti
He hunah hian K. Lalengliani, RKSK Coordinator chuan hriselna chungchang a sawi bawk a, zirlai kalkhawmte tan Slogan Writing Competition  neih nghal a ni.