Categories
News

VANGPUI KUT DUNGTLANG AH HMANG

VANGPUI KUT DUNGTLANG AH HMANG:
Tourism Minister Pu Robert Romawia Royte leh MLA 3 – Pu Ramthanmawia, Prof.F.Lalnumawia leh Pu C.Lalsawivunga te chuan ni 3 chhung thangin khawchhak tlangdung Tuipuiral leh Tuichangral khaw hrang hrang te an tlawh a. November ni 5 khan Farkawn leh Sawmkheng Tiau Kai tlawhin khawtlang hruaitute nen an inkawm a. November ni 6 khan Dungtlang 7000 khaw Lungphun kum 30-na hawngin Dungtlang khua ah hian Vangpui Kut vawi 33-na an hmanpui nghal a ni.
Vangpui Kut hi Dungtlang Zokhua ah hman a ni a. Khuallian Pu Robert Romawia chuan Dungtlang khua chu Mizo khaw lian hmasa a nih avangin khawvel hmun hrnag hranga Zofa ten hlut thiam a pawimawh tih a sawi a. Khawvel  hmun hrang hranga Zofate insuih khawma inpawh tawn chu Zofa zawng zawng te lungkham a nih avangin hemi kawnga tangkai tur leh khualzin te hip nan a kori tu tak tur a nih avangin Mizoram sawrkar chuan khawvel hmun hrang hranga Zofate awm tamna hmun 10 ah Zo hnam chi peng hrang hrangte huapzo tur, ZoKutpui buatsaih nan budget ah nuai 100 a dah a ni, a ti a. Heng hmun 10-a ZoKutpui hmanna tura mite pawh an phur hle tih a sawi. Pipu sulhnu hlui tam tak awmna khua Dungtlang chu vul zel turin duhsakna a hlan a ni.
Bialtu MLA Pu Ramthanmawia pawhin Vangpui Kut lawmna ah hian thu a sawi a. Nilengin zai leh lamin tlai lamah Vangpui Kut ruai hlim taka kilho a ni.
Tourism Minister leh MLA te hian Farkawn chhaka Zoram leh Burma inrina Sawmkheng Kai, Tiau Lui an tlawh avangin helai vela mipui te an lawm hle a. Burma leh Zoram inkal pawhna Sawmkheng Kai Lei thawm that nan Minister bakah Bialtu MLA Pu Ramthanmawia leh Aizawl South 3 bialtu MLA Prof.Lalnunmawia, te chuan an mimal sum thawh khawmin Rs.12000/- Tiau kama Zofate kutah an hlan a. VC te kaihhruaina in lei thawm that hna hi an thawk nghal dawn a ni. Minister leh MLA te hian Farkawna Aizawl FC Academy pawh an tlawh nghal bawk a ni.
November ni 6 vek hian Samthang, Vaphai, Leithum leh Vangchhia khuate tlawhin khawtlang hruaitute nen inkawmna an nei a. Fiaratui leh Tantlang te bakah Vangchhhia khuaa Kawtchhuah Ropui leh Ralven Puk te an tlawh bawk.  An kalna khua ah te hian khawtlang hruaitute nen inkawm zelin hmasawnna atana ruahmanna siam dan turte an sawipui a. November ni 7 hian Khawbung Tourist Lodge an endik bakah Mizo Hlakungpui Mual an tlawh a. Khawbunga Mini Sports Complex sak mek pawh an tlawh bawk a ni. Tunhma a Selsih 7000 khua Zawlsei pawh tlawhin khawtlang hruaitute an kawm a. East Lungdara Tourist Lodge an endik bakah khawtlang hruaitute nen East Lungdar Mini Sports Complex sak lai mek pawh an tlawh bawk.
Tourism Minister hova zin te chuan Thenzawl daia Wellness Spa & Cafeteria sak mek pawh tlawhin AC khawl dah dan leh a hungna hniam lutuk siam tha turin Contractor te hrilh an ni a. Pu Robert Romawia chuan khaw hrang hranga thu a sawina ah Chief Minister Pu Zoramthanga kaihhruai sawrkar chuan inthlan dawna mipui hnena an intiamna te chu a takin a ti hlawhtling chho zel a. Chief Minister leh Minister 11 te chuan mipuiin an thlan tlin chhan ang takin an department chan theuh te an enkawlna ah an Manifesto chu ah kaihruaitu ah an hmang vek a ni, a ti.
Tourism Minister hi MLA 3 te bakah hian Tourism Director Pu Saitluanga leh Officer dang ten an tawiawm a ni.