Categories
News

VC THU LO IN MOTOR REGISTER THEIH LOH

VC THU LO IN MOTOR REGISTER THEIH LOH :
Nimina Champhai khawpui leh a chhehvel
cheibawla hmasawnna ruhrel siam dan tur rela Champhai Master Plan Committee, Transport Minister TJ Lalnuntluanga hova DC Conference Hall-a thukhawm chuan, Champhai Town huam chhunga mi, an veng VC atanga Lirthei dahna an nei ngei a ni tih hriatpuina lehkha nei lo chu Lirthei register thar tawh loh ni se, tiin an rel.
Minister TJ Lalnuntluanga chuan, Champhai khawpui thanzelna leh nakin hun ngaihtuah chunga Champhai Master Plan tharthawh leh a nih thu sawiin, abul tanna chauh la ni mahase hlawhtling tur chuan a tak taka hnathawh a ngai a ni, a ti a. UD&PA Department lama mithiamte kaihhruaiin zirchianna zau zawk leh mipui ngaihdan lak a ni dawn tih a sawi a. Khawpui remfela cheibawl hna chu a bultanna mai a la nih avangin mithiam leh khawtlanga mitha hnemngaite chu Champhai khawpui Plan leh Leilet vawnhima tihchangtlun’tumina kawngah thahnemngai taka hotute tawiawma thurawnte pe zel turin a sawm a. Ngaihdan hrang hrang awm mah se a tha ber tur kalpui a nih theihna turin line department hrang hrang leh khawtlang aiawhte inthuruala thawhho a ngai dawn tih a sawi bawk.
Zirchianna peihfel a nih ve leh ngaihtuahna
zau zawk senga hmachhawpte Committee-in a zirchian leh tur thu sawiin, tih tur leh hmabak la awmahte ngaihtuahna nasa zawk senga thil tha leh tangkai zawk zirchhuah tum theuh turin a chah a. District Administration viak tha tak takte kaihhruaina hnuaiah puitlin
ngei a nih theih a beisei thu sawiin, Department kaihhnawih, khawtlang hruaitu leh mipui tawiawmna a ngen a. Champhai chu Mizorama Building regulations nei hmasa ber ni thei tura ngaihtuahna sen a nih thu leh, Road Safety Council-te pawh chak zawka
kalpui a tul thu a sawi a. Khawpui thang zel tur ngaihtuah chung zela Leilet phai vawnhim bakah, khawpuiin a ken tel mamawhte dahpawimawh chung zela hmalak tum a nih thu a sawi bawk.
Champhai Bawrhsap SL Naveen chuan
kalkhawmte lawmna thu sawiin, Law and Judicial Minister-in Champhai hmasawnna leh mamawhte hriaa Champhai Master Plan Committee a rawn ho thei chu lawmawm a tih thu a sawi a. Champhai Master Plan tihpuitlin a nih theihna turin sawrkar department hrang hrangte chu tawiawm turin a chaha ni.
He hunah hian R.Lalhmangaihzuali, Asst Director UD&PA chuan Master Plan awmzia, siam dan leh hemi kaihhnawiha hriattur tangkaite tarlangin, Champhai Master Plan tura ruahmanna neihte a sawifiah a. Champhai Master Plan tur chu GIS hmanga siam tur a nih thu leh huam zau tak, mipui tana tangkai thei tur ber leh nakin zel thlirlawka buatsaih tum a nih thu a sawi.
Meeting chuan Champhai khawpui tawt zel tur venna atan, Champhai Town area huam chhung bika Lirthei register thar tur zawng zawng ten DTO a ziahluh dawnin, mahni veng VC theuhte atangin Lirthei dahna an nei ngei a ni tih hriatpuina lehkha an keng ngei tawh tur a ni, tiin a rel a. Lirthei dahna nei ngei tih hriatpuina lehkha neilote chu DTO-in a register sak theih tawh dawn lo tih tarlan a ni bawk.