Categories
News

𝗡𝗶 21.7.2020 (𝗧𝗵𝗮𝘄𝗵𝗹𝗲𝗵𝗻𝗶) 𝗧𝘂𝗮𝗹𝗰𝗵𝗵𝘂𝗻𝗴 𝗖𝗵𝗮𝗻𝗰𝗵𝗶𝗻𝘁𝗵𝗮𝗿

𝗭𝗜𝗥𝗟𝗔𝗜 𝗔 𝗧𝗔𝗞𝗔 𝗛𝗠𝗔𝗡𝗚 𝗡𝗚𝗛𝗔𝗟 𝗧𝗨𝗥𝗜𝗡 𝗭𝗜𝗥𝗟𝗔𝗜 𝗖𝗛𝗔𝗛 :
Environment Forest & Climate Change Minister, Champhai South bialtu MLA ni bawk TJ Lalnuntluanga chuan nimin khan a bial chhung khaw hrang hrangte tlawh chhunzawmin, HSSLC leh HSLC Compartmental exam result puan taka hlawhtlinna changte fuihna leh lawmpuina hun a hmang.
Minister TJ Lalnuntluanga
chuan zirlaite chu an thil tih kawng tinrengah Pathian thu awi a, an hlawhtlinna chanin nakin zelah eng nge a thlen ang tih ngaihtuah thin tur leh, lehkha an zir theihna tura puitute hre reng a, midangte puitu nih tum thei turin a chah a.
Hlawhtlinna an chan hnuah pawh rilru diklo leh ngaihtuahna hrisel lo te nei lo a, rinawmna, taimakna leh dikna nena nun kawng zawh tum turin a fuih a. Lehkhathiamna chu Office hna atan chauh nilo, kut hnathawh kawngah pawh hlawk leh tha zawka tharchhuah theihna tura thiamna petu a ni thei tih hrethiam tura fuihin, hmabak awmah a eng zawnga thlir thiam turin a chah bawk.
Bawrhsap Maria CT Zuali chuan zirna uar deuh deuh a ngaih thu sawiin, lehkha thiam thei nazawng an hlawhtlin vek loh thu leh taima taka beitututen hlawhtlinna an chan thin thu a sawi a. Zirna chu hnathawh thiamna tura puitu pawimawh tak a nih angin mitin ten kan ngaipawimawh tur a ni, a ti a. Zirlai atanga thiamna neihte chu a tak ngeia hman tangkai kan tum tur a ni, a ti.
Minister TJ Lalnuntluanga hian nimin khan zirlai hlawhtlinna chang Zotlangah mi 28, Ruantlangah mi 10, Mualkawiah mi 4, Dilkawnah mi 4, Kelkangah mi 5, Melbukah mi 3, Zokhawtharah mi 21 hnenah lawmpuina thilpek Dictionary a hlan a ni. Minister hian Champhai Zotlang VC hnen atangin CM Relief Fund-a chhunluh tur tanpuina sumfai a dawng bawk.
Nimin zing khan Minister leh Champhai Bawrhsap Maria CT Zuali te chuan Govt. Zotlang Comprehensive Middle School bula leimin chu tlawhin hmalak dan tur an enfiah nghal bawk. Hetihlai hian Minister hi a hun hman dan tur tidanglamin vawiin leh naktuk hian Tuipuiral tlangdunga lirnghing tuarte thlamuan turin a tlawh kual ang. 
𝗗𝗜𝗘𝗧 𝗔 𝗭𝗜𝗥 𝗧𝗨𝗠 𝗧𝗔𝗡 :
DIET Aizawl-a 2020-21 Academic Session-a D.El.Ed (seat 120) leh B.Ed (Seat 50) zir duhte tan, Covid-19 hri leng vangin entrance test neih hun a la hriat theih loh a. An official facebook Page ‘DIET Aizawl’ leh an official website ‘dietaizawl.weebly.com’ ah te ngaihven tur a ni ang. D.El.Ed zir tur hian HSSLC-ah Mark 45% hmuh ngei ngei a ngai a, a chunglam degree nei tan pawh HSSLC-ah mark 45% hmuh a ngai. B.Ed zir turin Graduate leh a chunglamah mark 45% hmuh a ngai bawk.
𝗟𝗜𝗥𝗧𝗛𝗘𝗜 𝗖𝗛𝗘𝗦𝗨𝗔𝗟𝗔𝗛 𝗕𝗢𝗥𝗔𝗟 :
Pathianni tlai khan New Champhai leh Zotlang inkar, RD Filling Station thlen hma kawng kualah Scooter intai palhin Scooter khalhtu Gospel Lalhmangaihsanga, Kum 26, Lalrinkimi pasal chuan a lu-ah hliam na tak a tuar a. Champhai District Hospital-a dah luh a nih hnuin nizan hmasa khan enkawlna tha zawk dawng tura Aizawl panpui a nih laiin a hliam tuar lo hian Dulte daiah a boral a, a ruang hi nimin khan vuiliam a ni.
𝗣𝗔𝗪𝗟 𝗣𝗔𝗪𝗟 𝗦𝗔𝗪𝗜𝗟𝗢𝗜𝗡 𝗧𝗛𝗜𝗦𝗘𝗡 𝗣𝗘 :
Central KTP in Blood Donation calendar a siam angin Champhai Blood Bank a dah turin Champhai Vengthar Branch KTP te chuan nimin khan a mamawh apiangte hman turin thisen an pe a. Mipa 17 leh hmeichhia 9 te chuan thisen unit 26 an pe a ni. Nimina thisen pek hi Vengthar Branch KTP hminga pek ni mah se, Kohhran dang thalai te pawhin thisen hi an rualin an pe a, UPC atangin unit 4, Salvation Army atangin Unit 1 leh Zomi Baptist Church atangin Unit 2 an pe a ni.
District Hospital Blood Bank a thawktute chuan hetianga Kohhran inthliar hrang lova a huho a thisen an pe chu ropui an tih thu leh, Kohhran dangte tan pawha entawn tlak tak a ni tih an tarlang a. District Hospital-in thla tin thisen a mamawhna a san avangin thawktute chuan thisen pek kawngah Kohhran hrang hrangte bakah mimal leh pawl ten tan la thar
leh turin an ngen a ni.
𝗭𝗜𝗥𝗟𝗔𝗜 𝗧𝗜 𝗧𝗛𝗔 𝗖𝗛𝗔𝗪𝗜𝗠𝗔𝗪𝗜 :
Mizo Zirlai Pawl, North Khawbung Branch chuan nizan hmasa khan an huam chhung-a HSLC leh HSSLC pass thar te lawmpuina hun Lal Thanghlianga Hall-ah an hmang a, he hun hi Champhai Bawrhsap Maria CT Zuali chuan khuallian niin a hmanpui a ni.
Khuallian chuan zirlaite chu experience hrang hrang neih a tul rualin an zirlai chu a hmasa berah dah zel turin a chah a, mithiam an nihna te khawtlang chen honaah a lan theih nan mihring nunphung zir tel turin a chah bawk. Lalhmingmawia, North Khawbung khua chuan zirlai 2, First Division-a pass te zir lehna tur Admission fee a tum sakin, a hlan nghal bawk.