Categories
News

Ni 15.8.2020 (Inrinni)

𝗖𝗛𝗔𝗠𝗣𝗛𝗔𝗜 𝗗𝗜𝗦𝗧𝗥𝗜𝗖𝗧-𝗔𝗛 𝗩𝗖 𝗦𝗘𝗔𝗧 282 𝗠𝗜 723 𝗧𝗘𝗡 𝗜𝗡𝗖𝗛𝗨𝗛 𝗗𝗔𝗪𝗡 :
VC General Election 2020 lo awm turah Champhai District chhunga VC Seat 282 awmah, mi 723 ten hming an pe lut.
August ni 11 khan mahni khaw RO hnenah theuh VC chuh tumte’n an hming pe lut a. Endikna neih zawh hnu leh inhnuhdawhna hun hawn a nih hnuah Ningani khan District Election Officer hnenah an hming an theh lut fel a. Lalnunfela Chawngthu, Addl. DEO sawi danin, Champhai District chhungah Village Council 62 awmin, Seat 282 a awm a. General Seat 208 awmah VC chuh tum mi 548-te’n hming an pe lut a; hmeichhe tana Seat hauhsak 74 awmah mi 175 te’n VC chuh tumin hming an pe lut bawk. Champhai District chhunga VC chuh tum zawng zawng hi an vaiin mi 723 an ni.
MNF Party chuan General Seat leh hmeichhe tana Seat hauhsakte an chuh kim vek dawn a. New Hruaikawn leh Ruantlang Mualveng-ah te chuhtu nei lovin MNF atanga VC chuhte chu tlinga puan an ni a. INC chuan Seat 282 awmah Seat 229 chuhin, Seat 53 an chuh lova. General Seat 176 leh hmeichhe tana Seat hauhsak seat 53 an chuh a ni. 
INC hian khaw 6, Chhungte, Hmunhmeltha, Chawngtui E, New Hruaikawn, Thekpui leh Ruantlang Mualveng atangtein V.C. chuh tum an nei lo a ni.
ZPM chuan khaw 22-ah VC chuh tum an nei dawn lova; Seat 134-ah General seat 103 leh Hmeichhe tana Seat hauhsak 31 an chuh dawn a.
 BJP chuan VC 62 awmah khaw 6 atangin VC chuh tum an nei a; Seat 16-a General seat 14 leh hmeichhe tana Seat hauhsak 2-te an chuh dawn bawk a ni.
Khaw 28 ah mimala VC chuh tum awmin; Khaw 34 -ah mimala VC chuh tum an awm lo va. Mimala VC chuh tum hi 62 awmin, General seat-ah 47 leh hmeichhe tana Seat hauhsakah 15 an awm a. VC Seat 3 awmna Lianpuiah mimala VC chuh tum tam berin, General seat-ah 4 leh hmeichhe tana Seat hauhsak-ah mi 2, an vaiin mi 6, mimala VC chuh tum an awm a ni.
𝗧𝗛𝗟𝗔 𝗛𝗡𝗜𝗛 𝗕𝗜𝗟𝗟 :
PHE Department, Champhai WATSAN Division chuan spot billing kalpui a tum a. Meter entute’n handled device nen June-July leh July-August, thla hnih bill an siam dawn a. Hei hi mipuite’n lo hrethiam a, a hun taka bill pe turin an ngen bawk.
𝗡𝗢𝗥𝗧𝗛 𝗞𝗛𝗔𝗪𝗕𝗨𝗡𝗚 𝗧𝗟𝗔𝗡𝗚 𝗞𝗔𝗟 𝗣𝗛𝗔𝗟 𝗛𝗥𝗜𝗛𝗟𝗢 :
North Khawbung VLTF te chuan Covid-19 laka mipui an him zawk na’n hmun dang atanga North Khawbung tlanga len chu thuleh awm hma chuan a rem tawh loh thu leh kal lui an awm a, man an nih chuan N. Khawbung VLTF te’n an chungah hremna an lek kawh tur thu thuchhuah an siam.
𝗥𝗨𝗜𝗛𝗛𝗟𝗢 𝗠𝗔𝗡 :
Champhai Police leh CID (SB) Staff Champhai tangkawpte chuan nimin zing khan Khankawn Police Check Gate-ah Heroin Hawng 10 (Gram 127) leh a neitu-a puh Zorammuana, kum 31, Lalhmangaihsanga fapa, Tuirial, Aizawl nia insawi chu an man a. Zorammuana hi ND&PS Act hnuaiah thubuai siamsak nghal a ni.
𝗦𝗣-𝗜𝗡 𝗧𝗛𝗨𝗣𝗘𝗞 𝗖𝗛𝗛𝗨𝗔𝗛 :
Champhai SP Rex Zarzoliana chuan nimin khan, vanduai palh thulha COVID-19 hri kai kan awm palh a, a kaichhawn hlauhawmte chhui zuina hmanrua atan mitin zawm tur thupek a chhuah a. Gymnasium, beauty parlour, spa, lu mehna dawr leh infiamna hmun hrang hrangah te heng hmun dawrtu lut leh chhuak chhinchhiahna register felfai tak nei theuh turin a hriattir a. Hotel leh thingpui dawr nei ten anmahni dawrtute chhinchhiahna register nei ngei tur te; Dawr neitu ten anmahni dawrtu, physical contact an nei a nih chuan an hming leh address kimchang tarlanna an nei ngei tur a ni a. Heng chhinchhiahna, register hi Champhai District Police ten a tul hun apiangah an endik thin ang. Heng lu leh chhuak chhinchhiahna register-ah hian a tlawhtu hming, pa hming, address leh mobile phone number bakah dawr an kal hunte chiang taka ziahlan tur tih thupekah chuan a tarlang a. Mi tinin hei hi zawm a, ngai pawimawh theuh turin a hriattir a. Dan leh thupek kengkawhtute tha taka tawiawm turin mitin a ngen nghal bawk.
𝗠𝗜 𝗣𝗔𝗧𝗛𝗨𝗠 𝗖𝗛𝗔𝗨𝗛 𝗣𝗛𝗔𝗟 :
State Election Commission, Mizoram chuan Mizoram-ah COVID-19 vei an lo pun ve zel avangin mipui himna atan inkaihhruaina a siam belh a. Local Council leh Village Council inthlan campaign chungchangah khuahkhirhna hi siam belh niin, Candidate leh a zuitu midang pahnih aia tam lote tan In chhunga leng luta campaign phal a ni a; luh phalna erawhchu In neitute thu a ni thung dawn a ni.
𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 𝗠𝗔𝗡 :
Champhai Police-te chuan Ningani khan inkharkhipna dan bawhchhia mi 4 an man a, Rs. 100 theuh chawitir an ni. Ningani khan Mizoram hmun hrang hrangah dan bawhchhia mi 330 man an ni a, an pawisa chawi tlingkhawm hi Rs. 64,400 a ni.