Categories
News

Ni 24.8.2020 (Thawhtanni)

𝗗𝗔𝗠 𝗧𝗔𝗞𝗜𝗡 𝗗𝗔𝗠𝗗𝗔𝗪𝗜 𝗜𝗡 𝗖𝗛𝗛𝗨𝗔𝗛𝗦𝗔𝗡 𝗣𝗔𝗞𝗛𝗔𝗧 𝗞𝗔𝗡 𝗡𝗘𝗜 :
Covid 19 kai enkawl dam 1 chuan Inrinni khan DCHC Champhai a chhuahsan.
Covid 19 kai enkawl dam hi July ni 18-a Jammu & Kashmir atanga Champhai rawn thleng niin, July ni 22 khan Rapid Antigent Test hmangin Covid 19 a kai tih hmuh chhuah a ni a. Champhai district chhunga RAT hmanga Covid 19 kai hmuh chhuah hmasak ber a ni. July ni 22 khan Covid 19 kaite enkawlna tur bika duan, Dedecated Covid Health Centre-ah dah luh niin, Ni 31 enkawl a nih hnuah Covid 19 a kai tawh lo tih finfiah niin, Inrinni khan DCHC atang
hian chhuahtir a ni a; Champhai DCHC-a Covid 19 kai enkawl rei ber a ni.
Heti hian Champhai District chhunga Covid 19 kai hmuhchhuah 16 zinga 13-te chu enkawl dam tawh niin, mi 3 – mipa 2 leh hmeichhe 1 la enkawl mek an ni. Champhai-a Rapid Antigen Test hman tan a nih atangin Sample 189 endik tawh niin, Covid 19 kai mi 4 hmuh chhuah tawh an ni a. Silchar leh ZMC lab-a thawn tawh zawng zawng nen Champhai District chhungah Covid 19 kai leh kai lo endik mi 1991 an awm tawh a ni. State pawn atangin mi 5-te’n Champhai rawn thlen belhin Tourist Lodge Quarantine Centre-ah khung hran nghal an ni a. Nimin tlai thleng khan Champhai District chhunga Sawrkar hriatpui Quarantine Centre-ah tun hnaia state pawn atanga rawn haw mi 49 khung hran mek an ni a.
DPRC Quarantine Centre Keifangtlang-ah mi 17 – mipa 9 leh hmeichhia 8-te khung hran mek an ni a; Tourist Lodge Quarantine Centre-ah mi 28 – mipa 23 leh hmeichhia 5 bakah In lama khung hran mi 1 a awm bawk. Tun hnaia State pawn atanga rawn haw zingah mi 25-te Sample la laksak loh niin, Champhai an rawn thlen atanga ni 5 hnuah Sample laksak an ni ang.
𝗖𝗢𝗩𝗜𝗗-19 𝗩𝗔𝗡𝗚𝗜𝗡 𝗦𝗨𝗠𝗢 𝗦𝗘𝗥𝗩𝗜𝗖𝗘 𝗗𝗔𝗪𝗡 𝗟𝗢 :
Nimina Champhai-Aizawl Maxi Cab Service Owners Welfare Executive Committee thukhawm chuan, Champhai-Aizawl Maxi Cab Service chu hri pui laka Driver te leh Champhai mipui tan a him lo a an hriat avangin leh Champhai ah hri pu lut tu leh tidarhtu a nih theih avangin tunkar Nilaini, 26.8.2020 atanga thuleh awm hma chuan service loh ni se, tiin an rel a. Tul bik thil (emergency) awm thei a nih avangin hetiang thilah hi chuan hruaitute biak ni se, a tul dan a zirin phalna pek ni se, an ti. An service loh chhung hian route dang Champhai paltlangtute pawh fimkhur thu hla-ah Champhai khawchhung lut lo tura Khankawn police chek gate kaltlanga ngen leh thlen ni se tiin an rel bawk.
𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Champhai Police Flying Squad-te chuan Zirtawpni khan inkharkhipna dan bawhchhia mi 14 an man a, heng dan bawh chhia an mante hi vantlang hmuna hmai tuam lo vek niin, Rs 100 theuh chawitir an ni a, dan bawhchiate pawisa chawi tlingkhawm hi Rs. 1400 a ni. Inrinni khan dan bawhchhia hi mi 2 man an ni bawk a. Inrinni-a Mizoram puma dan bawhchhia an man hi 138 niin, an pawisa chawi chu a vaiin Rs. 39,300 a ni.
𝗔𝗬𝗙 𝗧𝗘𝗡 𝗧𝗛𝗜𝗦𝗘𝗡 𝗣𝗘 :
District Hospital, Champhai-ah thisen dahkhawl a tlem avangin AVBD leh District Hospital Blood Bank-a thawkte chuan Adventist Kohhran Thalai, AYF Champhai North leh South Bial-te chu tlawmngaia thisen pe tura an ngen angin Inrinni khan AYF te chuan District Hospital Blood Bank-a dah turin a hmuna kal chilhin thisen Unit 53 an pe a. Mipa 39 leh hmeichhia 14-te chuan thisen hi an pe a ni. District Blood Bank-a thawkte chuan mimal leh pawl tan thisen hi pek theih reng a nih thu an sawi bawk.
𝗠𝗜𝗡𝗜𝗦𝗧𝗘𝗥 𝗥𝗔𝗪𝗡 𝗛𝗔𝗪 :
Champhai South Bialtu MLA, Law & Judicial Minister TJ Lalnuntluanga chu vote a neihna Champhai Kahrawt venga VC inthlan neih tura vote thlak takin Aizawl atangin a rawn haw a, tunlai hian a bial chhungah hun a hmang mek. Inrinni khan Minister hian Mualveng Village Council thar a tlawh a. Mualveng mipui leh party hruaitute nen inkawm hona hun hmangin, Mualveng VC thar hma sawnna tur hrang hrang te an sawi ho a ni. He hunah hian Mualveng Unit, Mualveng welfare hruaitute leh Mualveng mipui te chuan kum 10 dawn an lo buaipui tawh, Village Council pek an ni ta chu an lawm hle tih an sawi. Minister hian a bial – Zotlang, Ruantlang, Vengthar leh Bethel veng te a tlawh zui ve bawk.