Categories
News

Ni 28.8.2020 (Zirtawpni)

𝗩𝗔𝗜 𝗦𝗜𝗣𝗔𝗜 𝗟𝗔𝗞𝗔𝗛 𝗠𝗜𝗭𝗢 𝗛𝗠𝗘𝗜𝗖𝗛𝗛𝗜𝗔 𝗧𝗘 𝗟𝗨𝗡𝗚𝗔𝗪𝗜𝗟𝗢 :
MHIP Sub-Headquarters Champhai chuan 8th Assam Rifles pakhatin Sesih khaw nu pahnih feh hawng khuaikhem an tum chungchangah thuchhuah siamin an lungawi loh thu an tarlang.
Thuchhuahah chuan August ni 15 tlai dar 4 vel a Sesih khaw nu pahnih feh hawng 8th Assam Rifles, Serchhip Headquarters mi pakhatin khuaikhem a lo tum chu an lungawi lo takzet tih an tarlang a. Kan ram leh hnam min veng a min humhimtu tura kan beisei laia hetiang a hmeichhe
zahawmna tibawrhbang zawng a an che hi kan Ram leh Hnam leh Hmeichhiate min hmusitin min tham lo hleah kan ngai a; hmeichhiate kan ralmuang ta lo a ni tiin thuchhuahah hian an tarlang.
Hemi chungchangah hian August ni 20 khan Champhai Police Station-ah FIR thehluh a ni a. He Assam Rifle mi, Hmeichhiate tiraltitu hi hi MHIP Sub-Hqrs,
Champhai chuan Mizoramah awm ve tawh ngai lo se an duh thu leh a rang thei ang bera a chung a ACTION lak a, a na thei ang ber a hrem an phut tlat tih an thuchhuahah hian an tarlang a ni.
𝗟𝗘𝗜𝗠𝗜𝗡 𝗥𝗔𝗪𝗡 𝗘𝗡 :
Champhai Bawrhsap leh DM&R Joint Director te chuan Kanan veng thlanmual an enfiah.
Nimin khan Champhai Bawrhsap Maria CT Zuali leh Zosangzuali Pachuau, Joint Director (Admin) DM&R Department-te chuan August Ni 1, 2020 zan ruahsur nasa tak avanga Champhai Kanan Veng Thlanmual min chu tlawhin hmalak dan turte an enfiah nghal a ni. Kanan Veng Thlanmual chim vang hian khawtlang hnatlangin thlan 49 chhiate hmun him zawkah an sawn a, thlanlung 14 dangte dah sawn a ni bawk.
Chawhnu lamah District Sericulture Office ramchhunga leikhi an enfiah nghal bawk.
𝗟𝗜𝗥 𝗔 𝗡𝗚𝗛𝗜𝗡𝗚 𝗟𝗘𝗛 𝗧𝗔𝗪𝗛 :
Nimin tlai dar 5:37 khan Farkawn bulah 5.3 magnitude-a na in lir a nghing leh a, Dar 6:16-ah 3.6 magnitude in a nghing nawn leh bawk.
Nimin tlai lirnghing hi Farkawn lamah chuan a na hle a, lirnghing vang hian Mizoram khaw chhak ama khaw tam tak an thlabar hle a. Lirnghing hmasa zawk hi a na angreng hle a, thil tihchhiat pawh a
nei nual niin an sawi. Khawbung lamah pawh he lirnghing hi a thawk na viau a, Khawbung rama Puanvawrh kham an tih chu lirnghing khan a sawi chim a, a thawm pawh a ring hle niin thu dawn a ni bawk.
𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Nilaini khan Champhai Police te chuan inkharkhipna bawhchhia mi 2 an man a, Rs. 100 ve ve chawitir niin, an pawisa chawi hi Rs. 200 a ni a. Nilaini khan Mizoram pumah dan bawhchhia mi 60 man niin an pawisa chawi hi Rs. 14,500 a ni.
𝗭𝗜𝗔𝗟 𝗟𝗘𝗛 𝗞𝗨𝗛𝗩𝗔 𝗠𝗔𝗡 :
Hripui leng mek vanga ramdang nena inkalpawhna khar a nih hnuah Champhai Police chuan ramri kana dan lova lakluh Kuhva leh Cigarette tam tham tak man tawhin, tunthla chhunga an man kuhva Bag 175 leh ramdang siam Cigarette Case 71 chu Champhai District Customs (Preventive) Force kutah an hlan
tawh a.
Heng an bungraw man te hi Nuai 41 man vel a nih thu Champhai Police hotute chuan an sawi a. Dan lova bungraw laluttu
mi 3 te lakah thubuai siam a ni bawk. Champhai District chhungah Myanmar nena inkalpawhna kawng a tam avangin, dan lova bungraw lut tur ven a hautak thu
thuneitute chuan an sawi a, August ni 15 hnulamah erawh dan lova bungraw tawlhluh man a awm rih loh thu Police hotute chuan an sawi a ni.