Categories
News

Ni 15.9.2020 (Thawhlehni)

π—–π—’π—©π—œπ——-19 𝗛π—₯π—œπ—ž 𝗛𝗠𝗨𝗛𝗑𝗔 π—žπ—›π—”π—ͺπ—Ÿ π—›π— π—”π—‘π—š 𝗧𝗔 :
District Hospital Champhaia Covid-19 hri kai leh kai lo enfiahna tur, TrueNat Quattro Laboratory bun thar chu nimin khan hman tan a ni.
Khawl thar hman tan puala inhrilhfiahna hun hman a ni a, he hun hi Dr. Zatluanga, Medical Superintendent, District Hospital Champhai chuan a kaihruai a. CMO Champhai Dr.R Lianmawia chuan Champhai district tana TrueNat khawl bun thar hman theih a ni ta chu lawmawm a tih thu sawiin, sawrkar hmalakna leh kan zavaia tanhona vanga hetiang hun thleng thei hi kan ni, a ti a. Aizawla sample test tura tum 20 chuang an lo kalpui tawh hautakzia sawiin, Champhai district tana hetiang khawl hman theih a ni ta chu a lawmawm hle tih a sawi bawk.
Dr.J.Lalramchhuanga, Leader, Covid-19 Treatment Team chuan tun dinhmunah Champhai District-ah Covid-19 hri kai 2 enkawl mek an nih thu leh an dinhmun a that thu a sawi a. Covid-19 laka fihlim tura hmaituamna vuah, kut silfai ngun, inhnaihchilh taka awm loh a tul thu leh sawrkar duan inkaihhruainate zawm zel a tul tih a sawi bawk.
Technical report petu Dr.R.Vanlalchhuangi, Biochemist, Nodal Officer, TrueNat Laboratory chuan TrueNat Lab bunfel a nih theihna tura hmalak dante a tarlang a. RNA Extractor 2 leh Analyser hmanga darkar khat vel chhunga test-te zawhfel hman theih beisei a nih thu te, hmun dang atanga lo hawte ni 5 hnuah sample laksak an nih thin thu leh Covid Care Centre a enkawl mek Covid-19 vei pahnihte tih loh sample lak tharte chu District Hospital TrueNat khawl hmanga enfiah a ni tawh ang tih a sawi a. Laboratory Technician 4 zinga 2 te chu Volunteer an nih thu a sawi bawk.
Thla kalta August Ni 26, 2020 khan Covid-19 hrikaite phurhna tur Ambulance lian Tata Winger, a chhung Air Condition chu Mizoram sawrkar atangin District Hospital Champhai chuan a dawng a. Dialysis khawl thar pawh tunah hian hman tan a ni tawh bawk a. Harsatna dang a awm a nih loh chuan nitin sample endik hna hi kalpui thei tura beisei a ni.
𝗗𝗔𝗑 𝗕𝗔π—ͺπ—›π—–π—›π—›π—œπ—” :
Champhai Police Flying Squad-te chuan Inrinni khan inkharkhipna dan bawhchhia, vantlang hmuna hmai tuam lo mi 5 leh Pathianni khan vantlang hmuna hmai tuam lo mi 7 an man a. Heng mite hi Rs. 100 theuh chawitir niin an pawisa chawi hi a vaiin Rs. 1200 a ni.
π—§π—¨π—œ π—₯π—˜π—‘ 𝗔 π—‘π—šπ—”π—œ :
Tunlai hian Tuipui Lui a nut avangin PHE Department chuan Fal lui tui an pump thin a. Fal lui hi tunlaia Champhai-in a rin rawl ber niin, a hnarah sangha dil siam a nih avang leh kawng laih a nih thin avangin Fal lui pawh hi a nu thin a, hei vang hian
PHED chuan duh angin tui an pump thei lo va; veng thenkhatah chuan tui sem hi khaihlakin kar khat chhunga tui sem theih lohna veng pawh a awm niin thu dawn a ni.
Hetiang hi a nih avangin PHED chuan tui ren tur leh, tunlai fur ruahtui tla te chu an theih ang ang a khawl nachang hre turin an chah thar leh bawk a ni.
π—–π—˜π—‘π—§π—₯π—”π—Ÿ π—”π—§π—”π—‘π—šπ—” 𝗦𝗨𝗠 π—₯𝗔π—ͺ𝗑 π—žπ—”π—Ÿ π—˜π—‘π——π—œπ—ž 𝗗𝗔π—ͺ𝗑 :
Central scheme hrang hrangte chu dik taka kalpui a nih theih nan Central BJP National President in BJP central scheme vigilance and monitoring cell din tura a tih angin BJP Champhai District pawhin an din fel a. Harsatna hrang hrang awm te chu Central BJP Office ah thlen zel tur leh, scheme chungchanga harsatna awm te pawh thlen tur tulte thlen zel turin hmalak an tum tih thu kan dawng.
π—žπ—›π—¨π—‘π—š 𝗛π—₯𝗔𝗑 𝗭𝗔𝗧 :
DPRC Institutional Quarantine Centre ah mipa 16 leh hmeichhia 6; Tourist Lodge Centre-ah mipa 5 leh hmeichhe 2 khung hran mek an ni a. Dedicated Covid Health Centre, Nursing School Building ah mipa 2 enkawl mek an ni a.
Champhai District chhunga khung hran mek te hi mipa 23 leh hmeichhia 8, an vaiin mi 31 an ni.
π—‘π—”π—§π—œπ—’π—‘π—”π—Ÿ 𝗙𝗒𝗒𝗗 π—¦π—˜π—–π—¨π—₯π—œπ—§π—¬ 𝗗𝗔𝗬 :
Inrinni khan Champhaiah District Civil Supply Office buatsaihin National Food Security Day 2020 hman a ni a, Mark Lalthanliana, Addl. DC Champhai chuan khuallian niin a hmanpui.
Khuallian chuan thusawiin, India ram chu Welfare State a nih angin sawrkarin a mipui te a ngai pawimawh hle a. Man tlawm zawka mirethei ten buhfai leh thildang an lei theihna turin kum 2013 September ni 12-ah Food Security Act pawm a ni, a ti a.
Covid 19 vanga State puma kan inkharkhip lai pawh khan he Act hnuai atang hian District Civil Supply Office, Champhai kaltlangin ei tur nei lote hnenah leh Champhai Home hrang hrangah buhfai sem chhuah a ni tih a sawi a.
NFSA, 2013 hnuaiah hamthatna dawng thei tur AAY leh PHH te hnenah thlatin buhfai man tlawmin pek thin a nih thu a sawi bawk. NFSA 2013 Mizorama hman a nih ve theihna tur atan State sawrkarin Rules a siam ‘The Mizoram Food Security Rules 2015’ Clause – 8 in a tarlan angin Veng/Khaw tinah Selection Committee, Concerned DCSO Chairman-na hnuaiah din vek a nih thu a sawi a. Central sawrkarin tunlai hri leng vanga ram puma buaina kan tawh laiin mi harsa zawkte’n awlsam zawka ei leh bar an hmuh theihna turin One Nation One Ration Card kalpuiin, India ram chhung khawi hmunah pawh Ration Card nei chuan ration an dawn theihna tur a ruahman a.
Hetianga min enkawltu sawrkar chungah mipui hian lawmna chang kan hriat a ngai a ni, a ti bawk.
Spencer Vanlalchhuanga, DCSO Champhai chuan Mizoram chhungah NFSA hnuaiah beneficiary 6,89,439; PHH-ah 6,13,481 leh AAY 75,958 an awm tih a sawi a.
Computerization Scheme kalpui a nih hnuah Mizoramin buhfai a lakluh apiang, state Kudam a rawn thlen atanga Retailer dawr a thlen thlenga buhfai chetvel dan hi online vek a ni chuan kawng laka buhfai bothlau tur nasa taka a ven thu a sawi a. NFSA hnuaiah hian AAY leh PHH te tan Ministry of Consumer Affairs, Food & Public Distribution, Govt. of India atangin thla tlin buhfai Metric Ton 5479.33 dawn thin a nih thu a sawi bawk.
π—§π—›π—¨π—£π—˜π—ž 𝗣𝗔π—ͺπ—§π—¦π—˜π—œ :
Kelkang leh Dilkawn inkar kawng siam hna thawh chu khawchhia vanga siam that zawh hman a nih loh avangin helai kawnga lirthei tlan hun leh kaltlang theih loh hun Champhai SP in thupek a lo chhuah tawh chu ni 18.9.2020 thleng atan pawhsei a ni.