Categories
News

Ni 2.9.2020

π— π—”π—›π—‘π—œ π—žπ—›π—¨π—”/π—©π—˜π—‘π—š 𝗗𝗔𝗑 𝗛𝗠𝗔𝗑 π—£π—›π—”π—Ÿπ—Ÿπ—’ :
Champhai District Bawrhsap Maria CT Zuali chuan thupek a chhuah in, Champhai District chhunga khaw thenkhat ten State dang emaw, Red Zone atanga rawn haw/kal ni lo leh Positive contact nei lo te an khung hrang thin tih hriat a ni a. Hei hian mi tam tak tan harsatna a thlen thin avangin Champhai District chhung khawi khua mahin a chunga tarlan atanga haw/kal ni lo leh Positive contact nei lo an khunghrang tur a ni lo, a ti a. Hrivei ni a rinhlelh an awm a nih chuan District Magistrate emaw, Incident Commander-te hnenah rang taka thlena anni in a tul angin hma an la thin ang. Midang tana harsatna siam zawnga mahni kuta thuneihna inpechawp lo turin Village Level Task Force te a hriattir nghal bawk.
π—–π—›π—›π—¨π—‘π—šπ—žπ—¨π—”π—œπ—‘ π—•π—˜π—œπ—›π—₯π—¨π—”π—Ÿ :
Tun thla hi Presbyterian Kohhran beih rual thla a ni a, hri pui leng vangin Champhai-a Presbyterian Kohhran thenkhat chuan chhungkuaa beih rual hmang turin ruahmanna an siam.
Nizan atang khan Presbyterian Kohhran thenkhat chuan chhungkaw tina hotu ber kaihhruaiin hun an hmang a, Pathian thu chhiar rual tur niin thupui leh Bible chhiar tur te ruahman in chhungkua a KTP member awm pakhat chuan thupui a hawng a. Hetiang hian tun thla ni 20 thleng chhungkaw hrang hrangte chuan anmahni Kohhranin inkaihhruaina a siam angin hun an hmang ang a, thupui hrang hrang siamte chu hawng tura ruatten an hawngin hla sak leh Bible chhiar rualna hun an hmang thin ang. KTP, Kohhran Hmeichhia leh Pavalai Pawl member te chuan Beihrual kaihhruaina hi inchhawkin an nei ang a, thupui duan sa an inhawn chhawk bawk ang.
π—§π—”π—‘π—£π—¨π—œ π—‘π—šπ—”π—œ π—§π—”π—‘π—£π—¨π—œ :
August ni 19, 2020 a Khuangleng dai a Sumo chesuala nunna chanta, Pi Laltlanliani leh tuna damdawi ina la awm mek, Pi Lalthlamuani te nufa chu niminpiah khan Lianpui Branch MHIP chuan hnatlangin an in hnih Lo chu a vawi 3 na atan an thlawh zawh sak. MHIP bakah hian Branch YMA te pawhin thi leh hliamna zualte tan vehbur khawn sakin tanpuina an hlan bawk.
π—Ÿπ—œπ—₯π—§π—›π—˜π—œ 𝗗𝗔𝗑 𝗕𝗔π—ͺπ—›π—–π—›π—›π—œπ—” :
August thla khan Champhai Traffic
Police-te chuan lirthei dan bawhchhia 27 an man.
Lirthei dan bawhchhia hi two wheeler 18 man an ni a, Rs. 13,100 chawitir an ni a, 3 wheeler man an awm lo va, 4 wheeler 9 man niin Rs. 7100 chawitir an ni a, lirthei dan bawhchhia 27 te pawisa chawi hi Rs. 20,800 a ni.
Champhai Traffic Police te chuan Licence nei lova lirthei khalh man an tam ber tih sawiin, hei hi dan kalh a nih avangin Licence nei lo te chuan lirthei khalh lo turin mipui an chah a, licence nei lova lirthei khalhtirtu pawh dan zawm lo a ni tih an tarlang. Insuarance nung lo leh kum tling lo lirthei khalh chhuak an awm fo chu an ngaimawh tih sawiin, MV Act Sec 158 in a phut angin lirthei khalhtu chuan Driving Licence, Insuarance, Fitness Certificate leh Permit tul dang lirthei tana pawimawh te chu keng thin turin an chah a, dan zawm theuh turin Champhai Traffic Police te chuan Champhai mipui, lirthei neitute leh khalhtute an chah a ni.
𝗩𝗖 𝗖𝗛𝗔π—₯π—šπ—˜ π—œπ—‘π—›π—Ÿπ—”π—‘π—”π—› π—‘π—¨π—”π—œ 50 π—–π—›π—¨π—”π—‘π—š π—›π—Ÿπ—”π—‘ π—§π—˜π—Ÿ :
VC Election-a Returning Officer C. Lalfela kaihhruaina hnuaiah nimin zing khan Khawbung VC te chu charge inhlanin, NGO leh Party hrang hrang hruaitu aiawh an tel a. VCP kal chhuak F. Vanlalriana chuan VCP thar C. Rokhuma hnenah VCP nihna hlΓ’nin, khawtlang inenkawl zelna atan Rs. 50,65,643 a hlan tel niin thu dawn a ni. Khawbung-ah hian VC seat 7 awmin, tun tum VC inthlanah khan MNF-in seat 4 lain, INC-in seat 3 an la a ni.Β