Categories
News

Ni 14.10. 2020 (Nilaini)

 𝗞𝗔𝗪𝗡𝗚𝗣𝗨𝗜 𝗧𝗜𝗖𝗛𝗘𝗣 𝗭𝗔𝗪𝗡𝗚𝗔 𝗕𝗨𝗡𝗚𝗥𝗨𝗔 𝗗𝗔𝗛 𝗦𝗘𝗡𝗚 𝗛𝗔𝗪𝗜 𝗧𝗜𝗥 :

Champhai District chhunga lirthei chevel leh mihring an himna tura Champhai District Magistrate-in September ni 21, 2020 a thupek a lo chhuah tawh bawhzuina kal zelah vawi hnihna atan nimin chawhnu khan Road Protection Squad Committee Champhai chu District Magistrate Maria CT Zuali hovin an thawkchhuak a. Mamawh huna hmanhmawh taka pan ngai District Hospital Champhai panna kawngpui nekchep zawnga hmalakna hrang hrangte an enfiah.
Road Protection Squad Committee Champhai hian District Hospital Champhai panna kawng, Champhai Vengsang kawngpui chu Hospital peng atanga enfiah tanin Biak in kawn thleng an enfiah a. VC te tawiawmna nen ngaihpawimawh lai awmte senghawia thianfai turin hriattirna pek ngaite an pe nghal zel a ni.
Road Protection Squad Committee Champhai chuan vantlang tana hnawk leh kawngpui dal zawnga hmalakna leh hnawksak siamte hnenah a rang lama seng hawi tura hriattirna pein a tul angin hma a la zel dawn a. A remchan dan ang zelin veng hrang hrangte fangin an endik zel dawn tih thu dawn a ni.
𝗠𝗢𝗧𝗢𝗥 𝗜𝗡𝗦𝗨𝗥𝗔𝗡𝗖𝗘 𝗧𝗛𝗜 𝗧𝗔𝗠 :
Champhai Traffic Police-te chuan September thla khan lirthei dan bawhchhia 49 an man.
September thla khan lirthei dan bawhchhia Two wheeler 24 man a ni a, Cheng 8,700 chawitir an ni a; 3 wheeler 4 man niin, Cheng 2,100 chawitir an ni a; 4 wheeler 21 man ni bawkin, Cheng 12,200 chawitir an ni bawk a. September thlaa lirthei dan bawhchhia man zawng zawng pawisa chawi hi a vaiin Cheng 23,000 a ni.
September thlaa lirthei man zinga tam ber chu MV Act 181, 196 leh 190 Dan bawhchhia an ni a; commercial vehicles-ah Insurance leh Fitness nung tawh lo, 2018-2019-a thi tawh an tam hle a.
Insuarance lem hmang an tam tih Traffic Police-te chuan sawiin, heng insurance lem hmang an mante hi hmang chhunzawm tawh lo tura an man sak thu leh mi dang lo hmang luite chu Dan ang taka an chungah hmalak a nih tur thu an sawi bawk.
Champhai Traffic Police-te chuan Lirthei neitute reng rengin DTO-ah Registration an tih hnuah, an lir thei Number Security Plate chhuah hma chu, MV Act Rules & Regulations 15-in a phut angin, lirthei Number chu standard size-in Reflector a bel vek tur a nih thu sawiin, Number plate chu eng mahin a hliah tur a ni lo va. Lirthei, a bikin Four wheeler-ah an phone No. an dah vek tur a ni a, hei hian tul bik thil leh emergency thilah a neitute awlsam taka biakpawh zung zung theihna tura tih a nih thusawiin, hengte hi lirthei neitute’n zawm ngei turin an ngen bawk a ni.
𝗛𝗥𝗜 𝗞𝗔𝗜 𝗔𝗪𝗠 𝗛𝗥𝗜𝗛𝗟𝗢 :
Nimin khan Covid Care Centre, Nursing School Building-a Covid-19 hri kai enkawl lai mipa 2-te chuan dam takin inenkawlna hmun an chhuahsan a. Heti hian Champhai district-a Covid-19 hri kai zawng zawng mi 23-te chu enkawl dam kim an ni ta.
Nimina hri kai enkawl damte nen hian mi 10-in Champhai District chhunga inkhunghranna hmun an chhuahsan a. Inkhunghranna hmunah mi 2 an lut thar ve leh bawk a. Champhai District chhunga inkhung hrang mekte hi an vaiin mi 31 an ni a. Sawrkar inkhunghranna hmunah mi 13 an awm mek a; in lama inkhung hrang mi 18 an awm bawk a; inkhung hrang mekte hi mipa 27 leh hmeichhia 4 an ni.
𝗗𝗔𝗡 𝗕𝗔𝗪𝗛𝗖𝗛𝗛𝗜𝗔 :
Champhai Police-te chuan tun Thawhtanni khan inkharkhipna dan bawhchhia, vantlang zinga hmai tuam lo mi 19 an man.