2021 CHHUNGIN CHENNA IN PATHUM KANG

Get real time updates directly on you device, subscribe now.

Champhai District Level Fire Prevention Committee buatsaihin ‘Kangmei Ven Hapta’ (Fire Prevention Week) tum 23-na February ni 7 atanga ni 12 thleng awh tur chu nimin khan Champhai District-ah hman tan a ni. Kangmei Ven Hapta hawnna hun MJA Press Club, Bethel Venga neih hi District Bawrhsap Pi Maria C.T Zuali chuan hmanpuiin, ‘Kangmei ven hi mitin mawhphurhna a ni’ tih thupui hmanga kangmei ven hapta hman tur chu a hawng a ni.
District Bawrhsap Pi Maria C.T Zuali chuan Champhai District chhunga ram ngaw chereu nasa lutuk leh nikum chhunga kangmei chhuak avanga ram zau tak a kang chu pawi a tih thu sawiin, lo hal vanga ram kang tih loh kangmei chhuak thei dangte titlem tura nasa lehzuala tanlak a tul takzet a ni, a ti a. Inzirtirna zau zawk neih a tul thu leh kangmei tichhuak thinte thlengpha zirtirna kalpui tuma ruahmanna siam a tul thu sawiin, thawhhona tha a awm phawt chuan kang mei chhuak lovin kan awm thei dawn a, mitinte che chhuak vek thei lo mah ila, mahni awmhmun atang pawhin theihtawp kan chhuah theuh thei a ni, a ti.
Champhai District chu hmun sang zawka awm a nih avangin kangmei chhuak a nasa zualin tanlak zual a ngai bik a ni, a ti a. District mawi, sik leh sa nuam tak venhim leh vawnhim kawnga theihtawp chhuah angaih thu pawh sawiin, ram kangin thing leh mau leh nungchate a suat tel thin bakah sik leh sa a tihdanglam avangin ecosystem thlengin a tibuai a, thilnungte leh kan vela awmte chu inmamawh tawn vek kan nih avangin kangmei chhuak nghawng thalote hrilhhriat kawngah midangte zirtir chhawng turin kalkhawmte a chah a. Ram ngaw neih that leh that loh chu hamthatna dawn kawnga tehfung pawimawh tak a nih tel avangin hemi kawnga tanla lehzual turin District mipuite a chah a. Meisiin darkar reiloteh kangmei nasa tak siamin chhiatna nasa zawk a siam thei a, chumi pumpelh tur chuan theihtawp chhuaha fimkhur a ngai a ni tiin, District mipuite chu kangmei ti chhuak lo tura mahni theihna zawn theuha tan khawh theuh turin a chah a ni.
He hunah hian Pu Lalduhthlana, DFO Champhai & Member Secretary, District Level Fire Prevention Committee chuan nikum lama kangmei ven hapta hman leh kumina hmachhawpte a tarlang a.Champhai District-ah November 2020 atanga May 2021 chhungin Lo, mimal ram leh vantlang ram kang tum 363 chhuak awmin ram kang zau zawng hi hectare 3390.11 a nih thu leh, forest ram kang hmun 3 a thleng vangin ram hectare 6.5 a zau a kan thu a tarlang a. Ram kang kaihhnawihah FIR 4 leh Court Case 1 thehluh a nih thu sawiin, mi 2 te pawisa chawitir an nih thu a sawi a. Ram kang bakah nikum chhung khan Champhai Fire Station huam chhungah chenna In 3 a kan thu a tarlang bawk a. Huan, Leipui leh Lo hal turte chu District Magistrate in March ni 15, 2022 aia tlai lova hal hman vek tura hriattirna a pek tawh thu a tarlang bawk.
Kangmei ven hapta chhung hian kangmei laka fimkhur tura inzirtirna, kangmei ven tangkaina leh kang thelh kawnga hriattur pawimawhte leh tul dangte a zau thei ang bera mipuite thlengpha ngei tura puanchhuah thin tum a ni a. Media hrang hrang, poster leh vantlang aurinna hmanga inzirtirnate puanchhuah thin tum a ni a, ran vulh mi, sapel thinte leh silai kawlte hnenah kangmei ven leh nungcha humhalh kawnga inzirtirna zau zawk neih tum a ni bawk a. Awareness Campaign lam hawi programme buatsaih tum zingah High School Level Essay Writing Competition, Air Rifle Shooting Competition, Awareness Rally te huaihawt tum niin, kangmei ven kawnga thawk tha khua/veng pathum bakah chawimawi phu khua/veng 3 dangte hnenah lawmman pek leh, kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam tum a ni bawk.
India State of Forest Report (ISFR) 2021 tlangzarh takin a tarlan danin ISFR 2019 report-ah Mizoram pumah ram hring sq.km 180.49 hloh a nih laiin, ISFR 2021 report-ah chuan sq.km 185.51 hloh belh leh a ni a. Champhai District bikin 2019 report a ram hring sq.km 115.21 a hloh laiin, 2021 report-ah chuan ram hring sq. km 113.90 lai a hloh belh leh bawk a ni. India rama ramngaw hausakna (growing stock) chawhrual chu 56.60 cubic metre per hectare (cum/ha) a nih laiin Mizorama ram ngaw hausakna chu 38.60 cubic metre per hectare (cum/ha) a ni thung.
Nimin kangmei ven hapta hawnna hun hi Pu Lalhlupuia, Honorary Wildlife Warden & Vice President, MJA Champhai District chuan a kaihruai a. Pu F. Lalnunhlima, RO, Champhai Forest Range in lawmthu sawiin hun a khar a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More