ni 23.1.2018 (thawhlehni) 

PARKING FEE KHAWN A NI DAWN TA:

        Nimin khan Champhai DC Vanlalngaihsaka hoin Champhai khawpui chhunga Parking fee khawn dan tur chungchang ah meeting neih a ni.

        He meeting hi Champhai DC Conference Hall, Keifangtlang ah neih niin Champhai khawpui chhung hmun 4 Awmpui Veng, Vengthlang Dawr Veng; Tuipui Bazar leh Bethel kawnah te Parking fee hi khawn tur a ni a. Parking fee hi sawrkar ruahmanna a siam sa pawmin khawn tur a ni a, darkar khatah Cheng 10 zel khawn tur niin lirthei dah rei dan a zirin parking fee hi san chhoh zel tura ni dawn a ni. Heng Parking fee khawnna turah hian Champhai District Transport Office te chuan reserve Price pawh ruahman fel tawhin vawiin January ni 23 atangin tender chhuah tan a ni ang a; February ni 23 Chhun dar 12 thleng tender hi chhan theih a ni ang. Parking Fee khawnna tura ruahmanna ah hian lirthei 284 dah theih tura ruahman niin Iirthei ke pahnih nei 123 leh LMV 81 dah theih a ni ang.

KAHRAWT LALNU BORAL :

         Nimin khan Champhai Kahrawt Lalnu hnuhnung ber Pi Dartintlingi chu vuiliam a ni. Pi Dartintlingi hi Zahau lal huaisen Nikuaia tunu a ni a, a pa chu Tualte Ial Lianhlira a ni. Kum 1926 khan Tualte ah a piang a, Kahrawt lal Thangtea fapa mal Chawngbuanga nen an innei a, fa 10 an nei. Pu Thangtea thih hnu hian a fapa Chawngbuanga chuan lalna a chang ve leh a, lal ban thleng khan a lal a ni. Pi Dari hi ni 21.1.2018 ‘ (Pathianni) dar 7: 30 pm khan Stroke vangin a boral ta a ni, nimin khan New Champhai thlanmualah vuiliam a ni. 

DC IN KAWNG SIAM EN :

         Nimin khan DC Pu Vanlalngaihsaka hovin New Champhai Ieh Zotlang inkar kawng siam mek chungchang  DC Conference Hall-ah sawi hovin thutkhawm a ni.

          He thutkhawmah hian Champhai Ieh Zotlang inkar Double Lane kawng siam mek chu a sir kam hnai tak takah mimal kudam sak niin sak tuma ruahhmanna siam tam tak an awm mek a, Kudam a bungraw hlan thlak leh hlan chhoh hi kawngpui ah motor din tira tih thin a nih avangin kawng a him tawk Io hle tih he meeting ah hian tarlan a ni.

         Kawngkama motor riak leh Kudam tam tak sak a nih avang hian thianghlimna kawngah harsatna siamin Champhai District ODF a puan tawh chu a dinhmun a nghing mek a ni tih tarlan a ni bawk. Heng harsatna te hi sutkian a nih theihna turin chiang zawk a zir chiang a khuahkhirh nise tiin a zir chiang tur team siam a ni bawk.

INKHEL HMAWRBAWK HNAI TA :

         Nimin khan Republic Day Football Tournament chu Chhangphut Field-ah khelh chhunzawm leh a ni a, quarterfinal thawhhnihna khelh zawh a ni. Inkhel hmasa zawkah Kahrawt FC leh Kanan FC inkhelin Kahrawt FC in 4-1 in hnehna an chang a, Quarterfinal Match hnuhnung berah New Champhai FC leh Venglai FC in si 4 faiin hnehna an chang bawk.
          Nilainiah Semifinal khelh a ni ang a, dar 11:00 ah FC Tlangsam leh Kanan FC an inkhel ang a, Chawhnu Dar 1:00 ah Venglai FC leh Mualkawi FC an inkhel bawk ang.

           Vawiin hian 1st Div League khelh chhunzawm leh a ni ang a, Dar 10:30 ah Champhai United FC leh Zotlang FC an inkhel ang a, Dar 12:30 ah FC Vengthlang N Ieh Bethel FC, Dar 2:30 Vengsang FC leh Vengthlang FC te an inkhel bawk ang.

TUIALHTHEI DINHMUN :

Petrol : Free Sale

Diesel : Tanky Full