www.champhai.net
TIAMCHIN AWM LO IN LIRTHEI DANG DAWN:
Champhai District Border Trade Transport Union leh a thawhpuite chuan tiamchin awm lovin Thawhtanni hian Zokhawthar kaltlanga bungraw phur lirthei chu dan an tum.
Hemi chungchangah hian Inrinni khan thuchhuah an siam a, Champhai District Border Trade Transport Union leh a thawhpuite hcuan Zokhawthar to Champhai Transport & Worker Union, ZOkhawthara
lirthei pawl indin ten mahnia thuneihna pumhlum chan tuma hma an la lakna duh loh lantir nan Thawhtanni atangin kawng chu thiamchin awm lovin foreign bungrua eng chi pawh phur thin tan kawng an khar dawn a. CTU leh a thawhpuiten duty in an dang dawn a ni. Kawng dan chhung hian sumo passenger phur ten bungrua pakhat mah phur lo turin an ngen a, tilui an awm chuan hlanthlaksak an nih tur thu an sawi. Hei bakah hian Champhai atanga bungraw phur chi zawng zawng ten kawng khar chhung chu zahsak a, phurlui lo turin an ngen a ni.
KHAWBUNGAH REPUBLIC DAY :
Khawbung RD Block Republic Day Celebration Committee chu zirtawpni tlai dar 3:00pm khan BDO Office Chamber-ah thu khawmin kum 2018 Republic Day chu Khawbung Zawlbuk Tual-a hmang turin thutlukna siam a ni.
Kumina Republic Day-ah hian School thlan bikte atangin March Past Contigent te’n hnam puan zar chibai an buk ang a, 14th Assam Rifle te’n rilfe salute an pe dawn bawk a ni. Republic Day Celebration Committee-te chuan kum danga an lo tih thin tawh angin Khawbung PHC Poor Fund-a dah tur committee member te’n thawh khawm ni se, kut hnathawktu hlawhtlingte hnênah lawmpuina thuziak leh tangkafai hlan ni bawk se tiin an rel a ni.
CHAMPHAI MIPUI TAN KUMINAH GAS TRIP 1:
Champhai mipui Gas hmanga khawsak rel te chuan harsatna an tawk chhunzawm zel.
Tarlan fo tawh thin angin Champhai Mizofed LPG ah Gas thleng a thahnem theih loh avangin Champhai mipui tam zawk chuan harsatna an tawk mek zel a, thenkhat chuan meihawl leh current thuk hmangin khawsak an rel mek a ni. Kum tharah hian Champhai Mizofed ah Gas trip khat chiah ala thleng a, lo thleng te hi sem zawh nghal zel a ni a, dah that engmah a awm tawh lova, kawnga rawn kal mek trip khat a awm bawk.
Hetihlai hian meihawl rawh a eizawng te chuan Gas vang hi an tangkaipui hle a, Champhai in Gas a hnianghnar lai aiin a letin meihawl an hralh niin kan palai an hrilh ve bawk.
B. THLENGA HRIATRENGNA MEET:
B. Lalthlengliana Memorial Tuipuiral Annual Meet 2018 vawi 45 na chu Sazep khuaah neih mek a ni.
Tuipuiral Annual Meet vawi 45 na hi ni 9 atang khan a thlengtu Sazep khaw Playground ah neih tan niin meet hi Pu T. Sangkunga’n a hawng a ni.
Meet ah hian Football leh Volleyball hmangin Tuipuiral huam chhunga khaw hrang hrang 16 te kalkhawmin intihsiakna an nei a, Football ah Team 18 awmin Pool A B C leh D ah te then a ni a. Pool A ah Sazep Red, Leisenzo, Thekte leh Sesih te an awm a, Pool B ah Khankawn, Khawbung, Leithum, Zawlsei leh Khuangleng te an awm a, Pool C ah Sazep Yellow, Dungtlang, Samthang leh Khuangthing te an awm a, Pool D ah Darkawn, Vanzau, Vaphai, Bungzung leh Vangchhia te an awm bawk.
Football hi Pool match khelh mek niin, vawii atang hian Football an khel chhunzawm dawn thung a ni.
Volley Ball ah Team 17 awmin Pool A B C leh D ah te then niin Pool A ah Farkawn, Dungtlang, Khawbung leh Vaphai te an awm a, Pool B ah Leithum, Sazep Red, Khuangthing leh Vangchhia te an awm a, Pool C ah Khankawn, Samthang, Khuangleng leh Vanzau an awm a, Pool D ah Sesih, Leisenzo leh Sazep Black te an awm ve bawk.
Zirtawpni atang khan Volley ball hi khelh tan niin Inrinni khan Volley Ball Quarter Final khelh zawh a ni a, Farkawn leh Khuangleng te inkhelin set hniha hnehna changin Farkawn te hian Semi Final an inhlang kai a, Match hnihnaah Vangchhia leh Sesih te inkhel ve lehin Vangchhe team chuan Straight Set lain Semi Final an inhlangkai ve bawk. Match thumnaah Samthang leh Vaphai te inkhelin set khat ve ve an lak hnuah Diciding ah Vaphai te chuan hnehna changin Semi Final an inhlang kai a, Match linaah Sazep Black leh Leithum te inkhel ve lehin Sazep Black te hian Straight Set lain Leithum an tlawm a, Semi Final an inhlang kai ve bawk. Karleh lamah Semi Final hi khelh tur niin Match khatnaah Vangchhia leh Farkawn te an intum ang a, Match hnihnaah Sazep leh Vaphai te an intum ve bawk ang.
NU HO KHAWMPUI DENCHHENIN:
Tuipuiral Block MHIP Conference denchhena hmeichhe volleyball inelna chu Zirtawpni khan zawh fel a ni.
Tuipuiral Block MHIP-te chuan infiamna lama hmeichhiate’n hma an sawnna atân leh block huam chhunga MHIP member-te inpawhtlânna atân Kum 2000 hma lamah football-a inelna an lo nei tawh thinin kum 2000 atang khan Block Conference-ah volleyball hmanga inelna an nei thin a ni bawk. Member te’n hma an sawnpuiin Mizoram aiawh pawha volleyball khel pha an awm a ni. Nimin khan Khawbung Zawlbuk tual-ah Pool A leh B runners up – Samthang leh Sesih team te’n pathumna inchuhin Sesih 2-1 in an chak a, Pool A leh B leader – Dungtlang leh Leithum team-te’n final khelin Leithum 3-2 in an chak bawk a ni.
INRINNI A FOOTBALL PET:
Inrinni khan Republic Dau Football Tournament leh Ist Div League khelh chhunzawm leh a ni.
2nd Div Clubte tana buatsaih Republic Day Football Tournament Match 4 khelh niin Inkhel hmasa berah Vengthar FC leh Zote FC te an inkhel a, 2-1 in Zote FC te hian hnehna an chang a. Match hnihnaah Venglai leh TMFC Melbuk te an inkhel a, 2-1 bawkin Venglai FC te hian hnehna an chang ve bawk. Match thumnaah Dinthar FC leh Ngaizawl FC te inkhelin, 2-2 in an inhneh tawk a, Match linaah Zotlang FC leh LKS Hnahlan FC te an inkhel a, 2-2 in an inhneh tawk ve bawk.
Vawiin hian 2nd Division match hnih awmin khelh chhunzawm leh a ni ang a, match hmasa zawkah Bethel FC leh Hmunhmeltha FC an inkhel ang a, Match hnihnaah Ruantlang FC leh FC Tlangsam te an inkhel ang. Dar 2 ah 1st Division Leaque chhunzawm ve leh tur niin Zotlang FC leh Vengsang FC te an inkhel dawn a ni.
BADMINTON INELNA
Champhai District Badminton Association buatsaihin Ni 23 Jan atang hian Champhai Town Hall-ah Champhai District Inter-Club Badminton Tournament & Sub-Junior Open, 2018 khelh a ni dawn a, Club hrang hrang; Tuipuiral Thlipui, Ngopa Badminton Club, Chhaktiang Badminton Club (Warriors), Chhaktiang Badminton Club (Thunders), Champhai Shuttlers, Ralte Villa Badminton Club, Kanan Warriors, Bethel Badminton Club, Venglai Sporting Club leh Morning Star BC te an tel dawn a ni. Tournament hi CCN in a LIVE-in a pechhuak ang.
VANTLANG HNUAILAM CHHUNGKUA 2705:
Champhai District a chhungkaw 29403 zingah chhungkaw 2705 te chu vantlang hnuailam (BPL) an ni.
Champhai District ah hian BPL chhungkua hi za zelah 9.2 an nih laiin, Above Poverty Line (APL) chhungkua hi 26621 niin za zelah 90.8 an ni thung.
TUIALHTHEI DINHMUN :
Petrol : Free Sale
Diesel : Tanky Full
Comments are closed.